37 ára fyrrum neðri deildar spilari gæti tekið við fótboltamálunum hjá United

Ole Gunnar Solskjær stýrir Manchester United út tímabilið eins og fram hefur komið en stóra spurningin er hvað gerist á Old Trafford næsta sumar. Hver tekur við liðinu til framtíðar og verður ráðinn yfirmaður knattspyrnumála?

Ensk félög eru almennt hrifnari af því að vera með hina svokölluðu knattspyrnustjóra sem að bæði stýra liðinu sem spilar inn á vellinum og nánast öllu sem fótboltanum tengist utan vallar eins og að kaupa leikmenn og að hugsa til framtíðar.

Á meginlandinu er algengara að vera með yfirþjálfara og svo yfirmann knattspyrnumála sem hugsar um hagsmuni félagsins til framtíðar en Manchester City hefur t.a.m. tekið upp þessa hugmyndafræði. Það réði Spánverjann Txiki Begiristain árið 2012 og lagði þannig grunninn að því að ráða Pep Guardiola árið 2016.

Í ítarlegri grein BBC er farið yfir nákvæmlega hvað yfirmaður knattspyrnumála og er vitnað í menn á borð við Begiristain og Damien Comolli sem sinnti sama starfi hjá Tottenham.

En, hver gæti orðið fyrsti yfirmaður knattspyrnumála hjá Manchester United. Nafnið sem hefur skotið upp síðustu daga er Paul Mitchell, 37 ára gamall Manchester-maður sem spilaði með neðri deildar liðum á borð við Wigan, MK Dons og Barnet áður en hann þurfti að leggja skóna á hilluna aðeins 27 ára gamall.

Mitchell var ekki lengi að finna sér starf í fótboltanum eftir að leikmannaferlinum lauk. Hann þykir mikill fótboltahugsuður og góður að finna leikmenn og það sá Karl Robinson, þáverandi knattspyrnustjóri MK Dons sem gerði hann að yfirmanni leikmannamála árið 2010.

Hann vakti mikla athygli þar og fékk sama starf hjá Southampton aðeins þrítugur árið 2012 en Mitchell átti sinn þátt í því að Southampton komst upp í úrvalsdeildina sama ár. Aðeins tveimur árum síðar var Mitchell kominn til Tottenham en Mauricio Pochettino vissi hvað hann gat og vildi fá hann með sér til Lundúna.

Mithcell átti átt í því að fá leikmenn til Tottenham á borð við Dele Alli, Kieran Tripper og Toby Alderweireld en hann yfirgaf svo Tottenham í mars 2017 og gerðist yfirmaður leikmannamála hjá RB Leipzig í Þýskalandi þar sem að hann sér einnig um þróun yngri leikmanna.

Gary Neville, fyrrverandi fyrirliði Manchester United og helsti sparkspekingur Sky Sports, hefur bent á Manchester-manninn Mitchell sem næsta yfirmann knattspyrnumála hjá United því hann hefur allt þrennt sem þarf til: Geta komið ungum leikmönnum alla leið í aðalliðið, stuðlað að því að liðið spili góðan fótbolta og auðvitað unnið fótboltaleiki.

Manchester United er sagt vera mjög áhugasamt um að fá Mauricio Pochettino til félagsins næsta sumar og telja sumir að það myndi hjálpa mikið til að fá Mitchell til félagsins. Hann gæti hjálpað til við að lokka Argentínumanninn á Old Trafford en saman létu þeir Southampton og Tottenham spila góðan fótbolta.

Mitchell fékk leikmenn á borð við Sadio Mané og Dusan Tadic til Southampton og eru þeir Pochettino enn þá mjög nánir.

Spurningin er væntanlega bara hvort að Paul Mitchell sé nógu stórt nafn til að rata inn á borðið hjá Ed Woodward, stjórnarformanni Manchester United.