Fékk ekki að spyrja Pochettino um Manchester United starfið

Mauricio Pochettino hélt blaðamannafund í dag fyrir leik Tottenham á móti Gylfa Þór Sigurðssyni og Everton í ensku úrvalsdeildinni um helgina.

Mauricio Pochettino hefur verið orðaður við stjórastöðu Manchester United þegar félagið ræður framtíðarstjóra sinn í sumar og Argentínumaðurinn var ekki tilbúinn að loka á þann möguleika á blaðamannfundi fyrr í vikunni.

Blaðamenn sem ætluðu að nýta sér tækifærið til að spyrja Mauricio Pochettino út í stjórastöðuna hjá Manchester United komust hinsvegar ekki mjög langt.

Fjölmiðlafulltrúi Tottenham stoppaði spurningu blaðamanns Sky Sports og neitaði honum um að spyrja Mauricio Pochettino út í Manchester United starfið.

„Við ætlum ekki að láta annan blaðamannafund okkar snúast um tal um Manchester United,“ sagði fjölmiðlafulltrúinn en það má sjá þessi samskipti hér fyrir neðan.