Arsenal og Tottenham sektuð fyrir hegðun leikmanna

Arsenal og Tottenham þurfa bæði að borga sekt fyrir ósæmilega hegðun leikmanna þeirra í leik liðanna 2. desember síðast liðinn.

Eftir að Eric Dier jafnaði fyrir Tottenham og kom stöðunni í 1-1 lenti honum saman við leikmenn á varamannabekk Arsenal. Úr varð allsherjar rifrildi á milli leikmanna beggja liða.

Arsenal þarf að borga 45 þúsund pund í sekt og Tottenham 50 þúsund pund. Tottenham þarf að greiða meira þar sem brotasaga félagsins í málum sem þessum er lengri en sú hjá Arsenal.

Leiknum lauk með 4-2 sigri Arsenal.