Berbatov: Tottenham þarf að vinna eitthvað til að halda Pochettino

Dimitar Berbatov, fyrrum framherji Manchester United og Tottenham, segir að Tottenham þurfi að fara vinna bikara til að halda Mauricio Pochettino sem stjóra liðsins.

Pochettino hefur gert frábæra hluti með Tottenham en Berbatov segir að þjálfarar séu eins og leikmenn; þeir vilji vinna bikara.

„Þeir hafa allt það sem þjálfarinn myndi vilja hafa; frábæran leikmannahóp, góðan æfingavöll og frábæran völl. Kannski eru verðlaun það sem eina þá vantar,“ sagði Berbatov við Sky Sports.

„Það er eins hjá þjálfurum og hjá leikmönnum að þeir vilja vinna eitthvað og skilja eitthvað eftir sig. Tottenham þarf að vinna eitthvað til að Pochettino verði áfram.“

„Það er eina það sem þá vantar. Ég vona að hann verði áfram og allir þeir sem ég tala við, tala vel um hann. Ef Tottenham vill fara í hæstu hæðir þurfa þeir að halda Pochettino.“