Fyrsti blaðamannafundur Solskjær: Ekki búið að ræða lengri samning

Ole Gunnar Solskjær hélt sinn fyrsta blaðamannafund sem stjóri Manchester United í dag. Norðmaðurinn tók við liðinu til bráðabirgða í vikunni.

„Ég þurfti ekki að hugsa mig tvisvar um þegar þeir hringdu og vildu mig sem leikmann og þetta er augljóslega meiri heiður,“ sagði Solskjær.

Hann tók við liðinu eftir að Jose Mourinho verður rekinn og mun stýra því út tímabilið þegar nýr framtíðarstjóri verður ráðinn.

„Það eru forréttindi að fá að hjálpa félaginu í nokkra mánuði. Ég verð bara fram á sumar, í fimm eða sex mánuði, bara til þess að hjálpa til á meðan félagið finnur annan stjóra til framtíðar.“

„Mitt hlutverk er að gera eins vel og ég get og hjálpa liðinu áfram eins vel og hægt er. Það eru margir stjórar í heiminum sem vilja þetta starf og ég er einn af þeim, en við höfum ekki rætt um að ég verði áfram.“

„Þeir munu fara í gegnum sitt ferli á næstu sex mánuðum.“

Solskjær stýrði sinni fyrstu æfingu í gær og hann sagði andann innan liðs United vera góðann.

„Það er spennandi að hitta nýtt fólk í fyrsta skipti. Ég þekki nokkra þeirra frá því að ég var með varaliðið og sá þá alast upp, suma frá því ég var að spila sjálfur. Leikmennirnir hafa verið frábærir.“

Janúar nálgast óðfluga og með honum kemur félagsskiptagluggi. United gæti gert einhverjar breytingar þá og sagðist Solskjær fá að hafa sitt að segja um hver kemur inn.

„Ég sá næstum hvern einasta leik í Noregi, en ég þarf að kynnast leikmönnunum og sjá hvernig ég get hjálpað þeim bæta sig.“

„Félagið er með sína menn í að finna nýja leikmenn og ég er viss um að þeir séu með ákveðin nöfn í huga.“

Fyrsti leikur Solskjær verður gegn eina liðinu sem hann hefur stýrt í ensku úrvalsdeildinni, Cardiff.

Það verður þó að mestu í höndum Michael Carrick og Kieran McKenna að ákveða byrjunarliðið því þeir hafa verið í kringum liðið allt tímabilið.

Solskjær sagðist enn ekki hafa hitt Romelu Lukaku, Belginn fékk tveggja daga frí af persónulegum ástæðum og mun hann líklega ekki vera með gegn Cardiff.

„Ég vil koma mínum áherslum til strákanna fyrir fyrsta leikinn. Fá þá til þess að skilja strax hvernig ég vilji spila. Við vinnum saman og sjáum svo hversu mörgum stigum við náum, ég ætla ekki að setja mér nein markmið.“

„Ég mun ræða við þá leikmenn sem eru lítið að spila og tala við þá. Þegar þú ert hjá Manchester United þá er ætlast til þess að þú sért liðsmaður. Það þekkja fáir það betur að vera á bekknum en ég.“

Sir Alex Ferguson fékk Solskjær til liðsins árið 1996 og hefur hann haft mikil áhrif á feril Norðmannsins eftir að skórnir fóru á hilluna.

„Hann hefur áhrif á allt. Hvernig hann hagaði samskiptum sínum, hvernig hann stýrði félaginu, hvernig hann náði að halda 25 landsliðsmönnum glöðum og hungruðum í að bæta sig.“

„Hann er minn lærifaðir. Þegar ég meiddist árið 2003 fór ég að punkta niður allt sem hann gerði.“

„Ég er búinn að tala við hann nú þegar, það er enginn betri til þess að leita ráða hjá,“ sagði Ole Gunnar Solskjær.

Leikur Cardiff og Manchester United hefst klukkan 17:30 á morgun, laugardag, og er í beinni útsendingu á Stöð 2 Sport.