Guardian: Mourinho lifir af Liverpool-leikinn og verður ekki rekinn

Starf José Mourinho hjá Manchester United er ekki í hættu þrátt fyrir slaka frammistöðu hans manna og sannfærandi tap United liðsins á móti Liverpool á Anfield í ensku úrvalsdeildinni.

Guardian hefur heimildir fyrir því að Mourinho verði ekki rekinn í framhaldi þessa leiks og muni því stýra liði Manchester United áfram. Framundan er jólavertíðin þar sem verða margir leikir á stuttum tíma.  

Það hefur gengið á ýmsu hjá hinum 55 ára Portúgala á þessu tímabili og eftir 3-1 tap á móti Liverpool í gær er United nú 19 stigum á eftir erkifjendum sínum í Liverpool.

Even a José Mourinho gripped by defensive dogma was better than this. By @jonawilshttps://t.co/4l7bA3LDA0

— Guardian sport (@guardian_sport) December 17, 2018

Manchester United hefur unnið 7 af 17 deildarleikjum sínum og markatalan er 29-29 eftir þessa sautján leiki.

United er í sjötta sæti ensku úrvalsdeildarinnar en það eru samt heil ellefu stig upp í fjórða sætið þar sem Chelsea situr.

Þetta er versta byrjun Manchester United í ensku úrvalsdeildinni síðan 1990. United er líka dottið út úr enska deildarbikarnum en enski bikarinn byrjar ekki fyrr en í janúarbyrjun og liðið mætir síðan Paris Saint Germain í 16 liða úrslitum Meistaradeildarinnar.