Neville hefur aldrei þjálfað, sótti ekki um starfið og grínaðist með að berja konur

Phil Neville, fyrrverandi leikmaður Manchester United og Everton, var í gær, ansi óvænt, ráðinn þjálfari enska kvennalandsliðsins sem er það besta í Evrópu samkvæmt styrkleikalista FIFA.

Ráðningin þykir ansi sérstök í ljósi þess að Neville hefur aldrei áður verið aðalþjálfari og hann sótti ekki einu sinni um starfið. Það gerðu aftur á móti nokkrir öflugir aðilar eins og kom fram í frétt Guardian í síðustu viku.

Samkvæmt The Guardian átti þekktur sjónvarpsmaður í Englandi hugmyndina um að ráða Neville en hún vaknaði eftir nokkra stífa í boði sem enska knattspyrnusambandið hélt í desember.

„Var að berja konuna“

Það var þó ekki sú staðreynd að Neville hefur aldrei þjálfað eða að hann sótti ekki um starfið sem gerði allt vitlaust í Englandi í gær þegar að tilkynningin var send heldur voru gömul tíst nýja landsliðsþjálfarans af Twitter grafin upp.

Þar fer Neville ófögrum orðum um konur og lítur vægast sagt illa út, sérstaklega í ljósi þess að nú er hann landsliðsþjálfari kvenna. Hann var fljótur að eyða Twitter-aðgangi sínum en þá voru menn löngu búnir að vista tístin.

Það versta var frá 1. júlí 2011 en þá skrifaði Neville: „Kominn aftur, vel slakur - var að berja konuna og líður miklu betur núna.“

Hann svaraði einnig systur sinni, Tracey Neville, í desember 2012 þegar að hún skaut á hann fyrir að vera milljarðamæringur en vilja samt skipta reikningum í tvennt á veitingastöðum.

Svarar í næstu viku

„Þið konur viljið alltaf jafnrétti þangað til það kemur að því að borga reikninginn,“ sagði Neville og bætti við myllumerkinu #hræsnarar.

Einn janúarmorgun árið 2012 vaknaði svo Neville og bauð bara karlmönnum góðan daginn og fékk greinilega eitthvað bágt fyrir það. Hann sendi þá út annað tíst sem hljóðaði svo:

„Þegar að ég sagði góðan daginn menn hélt ég að konurnar væru of uppteknar að elda morgunmat, gera krakkana klára eða búa um rúmin. Afsakið. Góðan daginn, konur!“

Fram kemur í frétt Daily Mail að Phil Neville ætli ekki að svara fyrir þetta allt saman fyrr en í næstu viku þegar að hann verður formlega kynntur til leiks á blaðamannafundi enska sambandsins.