Hodgson hrósaði myndbandsdómurum þó þeir væru ekki nýttir

Roy Hodgson hrósaði myndbandsdómarakerfinu eftir leik Brighton og Crystal Palace í þriðju umferð ensku bikarkeppninnar í fótbolta í kvöld, þrátt fyrir að það hafi ekki þurft að grípa til tækninnar í leiknum.

„Við verðskulduðum jafntefli, en þeir settu Murray inn á og hann skoraði. Ég trúi því að þeir hafi skoðað þetta því það lítur út fyrir að boltinn fari í hendina á honum, en í endursýningu sést að það var ekki. Til hamingju með myndbandstæknina,“ sagði Hodgson, en hans menn í Crystal Palace töpuðu 2-1 og eru því úr leik í bikarnum.

Glenn Murray skoraði sigurmark Brighton undir lok leiksins. Boltinn fór þá í hnéð á Murray og þaðan í markið, en við fyrstu sín hefði mátt ætla að það hafi verið hendi Murray en ekki hnéð sem kom boltanum yfir marklínuna. 

Andre Marriner, dómari leiksins, notaði myndbandstæknina þó ekki í leiknum, að minnsta kosti ekki með þeim formlega hætti að stoppa leikinn og fá að skoða atvikið. Hann hefur þó líklega ráðfært sig við þá sem horfðu á leikinn í gegnum sjónvarpsskjái áður en hann dæmdi markið gilt.

„Ég vona að myndbandsdómarakerfið hafi hjálpað til í þessu tilfelli. Vonandi tók það rétta ákvörðun. Það virkaði vel, þeir ákváðu að markið ætti að standa og ég get ekki mótmælt því,“ sagði Roy Hodgson.