Sky segir Gylfa besta leikmann ensku deildarinnar í síðustu leikjum

Gylfi Þór Sigurðsson er besti leikmaður ensku úrvasldeildarinnar um þessar mundir samkvæmt styrkleikaröðun Sky Sports.

Gylfi skoraði frábært mark í 2-1 sigri Everton á Leicester á laugardaginn, fjórða mark hans í síðustu fjórum leikjum. Hann hefur spilað frábærlega í síðustu leikjum og frammistaðan um helgina kom honum í toppsæti styrkleikaröðunar (e. Power Rankings) Sky Sports.

Raheem Sterling var efstur á þeim lista en hann datt niður í sjöunda sæti. Arsenalmaðurinn Alexandre Lacazette er í öðru sæti listans eftir tvö mörk í sigri á Fulham og Belginn Eden Hazard er í þriðja sæti.

Þegar horft er á allt tímabilið, ekki bara síðustu fimm leiki, er Gylfi í öðru sæti, rétt á undan Raheem Sterling en nokkuð á eftir Eden Hazard sem hefur verið bestur á tímabilinu.

Styrkleikaröðunin er reiknuð með því að gefa leikmönnum stig fyrir 34 mismunandi tölfræðiþætti.