„Jóla-Paul er á leiðinni og ein­hver verður rotaður“

Jake Paul hefur samþykkt að berjast í Dúbaí í Sameinuðu arabísku furstadæmunum en hann verður aðalnúmerið á viðburði á aðfangadag. Andstæðingur hans verður hins vegar kynntur síðar.

Þetta verður fyrsti bardagi Pauls síðan Anthony Joshua sló hann niður í sjöttu lotu í bardaga þeirra 19. desember í fyrra í Miami. Paul fór mjög illa út úr því höggi þar sem hann kjálkabrotnaði og þetta voru meiðsli sem kölluðu á fleiri en eina skurðaðgerð bæði í desember og febrúar.

„Ég hef eytt árum í að sanna að fólk hafi rangt fyrir sér, taka áhættu og etja kappi við andstæðinga sem enginn hélt að ég myndi mæta,“ sagði Paul í yfirlýsingu. 

„Ekkert af því sem hefur gerst hefur breytt trú minni á sjálfan mig eða því sem ég stefni að. Ég er hungraðri en nokkru sinni fyrr og fimmtudaginn 24. desember sný ég aftur í hringinn í Dúbaí til að hefja næsta kafla ferðalags míns,“ sagði Paul

„Við erum með fullt af nöfnum á listanum; sjáum hver skrifar undir samninginn. Gleðileg jól, Dúbaí. Jóla-Paul er á leiðinni og einhver verður rotaður,“ sagði Paul.

Hinn 29 ára gamli Paul fékk grænt ljós á að hefja æfingar með fullri snertingu fyrr í þessum mánuði. Hann birti lista yfir óskaandstæðinga sína, þar á meðal núverandi og fyrrverandi heimsmeistara í hnefaleikum á borð við Canelo Alvarez, Ryan Garcia og Deontay Wilder, auk MMA-bardagakappanna Conor McGregor, Nate Diaz, Francis Ngannou og Darren Till, svo einhverjir séu nefndir.

Fyrir tapið gegn Joshua hafði Paul unnið sex bardaga í röð, þar á meðal stórviðburð á Netflix gegn fyrrverandi heimsmeistaranum í þungavigt Mike Tyson í nóvember 2024.