Fellaini kærði skóframleiðandann sinn

Marouane Fellaini hefur kært íþróttavöruframleiðandann New Balance fyrir að framleiða skó sem skemmdu á honum lappirnar.

Árið 2012 skrifaði Belginn undir fjögurra ára samning við fyrirtækið, en hann hefur nú skipt yfir til Nike og samkvæmt fjölmiðlum á Englandi farið fyrir dómstóla og heimtað skaðabætur.

Fellaini sagði að skórnir hefðu valdið honum töluverðum meiðslum og hann hafi ítrekað látið framleiðandanum í ljós óánægju sína.

Lögfræðingar Fellaini bæta við kæruna að skórnir hafi valdið honum vinnutapi þar sem hann spilaði verr í skónum.

New Balance varðist kærunni með því að segja að Fellaini hafi áður lýst skónum sem „fullkomnum.“

Hvort sem skórnir hafa valdið Fellaini meiðslum eða ekki, þá er hann í miklum metum hjá knattspyrnustjóra sínum, Jose Mourinho.

„Ég verð að taka fram að Fellaini var frábær. Fyrir mig, fyrir liðsfélagana, fyrir stuðningsmennina, fyrir liðið, fyrir félagið. Hann var meiddur í nokkrar vikur, mætti á æfingu í gær [á laugardaginn] í fyrsta skipti og lagði sig allan fram fyrir liðið,“ sagði Mourinho í viðtali eftir tap Manchester United gegn Chelsea í gær.