Skátar án farangurs

Alls fór sjúkrabíll af skátasvæðinu á Úlfljótsvatni um 10 sinnum með sjúklinga, nokkrir tugir þurftu að leita á spítala vegna veikinda og í sjúkratjaldinu á staðnum var tekið á móti hátt í þúsund manns.

Stærsta skátamóti Íslandssögunnar lauk á miðvikudag en um fimm þúsund manns frá yfir 100 þjóðum tóku þátt og gekk mótið almennt vel að sögn mótsstjóra.

„Það hefur almennt gengið gífurlega vel og margra ára undirbúningsvinna sjálfboðaliða að skila sér. Þar að auki vorum við einnig mjög heppin með veður,“ segir Hrönn Pétursdóttir mótsstjóri.

Hún segir að þegar um er að ræða svo stóran viðburð sé alltaf eitthvað sem kemur upp. Sem dæmi nefnir hún að 50 skátar hafi verið farangurslausir allt skátamótið og ekki enn fengið farangurinn sinn.