Garðbæingar klæðast 66°Norður úlpum og aka um á Land Rover

Þátttakendur í fjórum rýnihópum um þjónustu Garðabæjar nefndu ítrekað að bærinn væri einsleitt samfélag fyrir vel stætt fólk og að útlit og hegðun til dæmis ungmenna væri dæmi um að þar væru flestir með iPhone-síma, í 66°Norður úlpum og fólk æki um á Land Rover Discovery.

Þetta kom fram á fundi bæjarráðs Garðabæjar í gær þar sem fjallað var um greinargerð Gallup um niðurstöður rýnihópanna.

Í greinargerðinni kemur einnig fram að margir þættir þóttu bera þess merki að Garðabær stæði betur fjárhagslega en nágrannasveitarfélögin, til að mynda væru þar góðir skólar og leikskólar og myndarlegur stuðningur við íþróttafélagið Stjörnuna.

Aftur á móti var ágreiningur um hvort það væri dýrt eða ódýrt að búa í Garðabæ. Það sem var talið hagkvæmt var ódýrari dagmæður, lægra útsvar og val um sumarfrí.

Á hinn bóginn töldu sumir þátttakendur of dýrt að búa í bænum og voru dýrar tómstundir og ýmis gjöld nefnd. Þá væri lítið af ódýrari úrræðum fyrir til dæmis yngra fólk. Íbúðaframboð væri einhæft og dýrt.

Niðurstaða rýnihópa Gallup er að þjónustan í Garðabæ þyki góð á mörgum sviðum og framúrskarandi á til dæmis leik- og grunnskólastigi að undanskildum ábendingum um lélegt húsnæði.

Aftur á móti séu næg tækifæri til að gera betur í þjónustu við fatlað fólk, og voru húsnæðismálin þá nefnd auk þess sem mikið af þjónustunni fari fram í öðrum sveitarfélögum, til dæmis Kópavogi og Hafnarfirði.

Oft var minnst á að Garðabær væri um marga hluti afskaplega einsleitt bæjarfélag og var umræðan neikvæð um áhrif þess. Stærð og tegund húsnæðis væri einsleit, lítið væri um fjölbreytni íbúa í bæjarfélaginu og það væru fá félagsleg úrræði. Að auki var nefnt að áhersla á íþróttafélagið Stjörnuna væri mikil og því minni gróska í öðru íþrótta- og tómstundastarfi, til dæmis eftir skóla.

Fréttin birtist fyrst í Fréttablaðinu.