Lögðu hald á 16 kíló af kókaíni á fyrstu sjö mánuðum ársins

Alls hefur verið lagt hald á um 16 kíló af kókaíni af mismunandi styrkleika á fyrstu sjö mánuðum ársins á Keflavíkurflugvelli og 1.950 ml af fljótandi kókaíni eða um 4.500 grömm í neyslustyrkleika. Talið er að þetta sé mesta magn kókaíns sem lagt hefur verið hald á Keflavíkurflugvelli.

Tollgæslan hefur lagt hald á mun meira magn af fíkniefnum á fyrstu sjö mánuðum ársins 2017 en á sama tíma á síðasta ári. Efnin hafa öll fundist innvortis eða í farangri farþega á leið um Flugstöð Leifs Eiríkssonar.

Lögreglan á Suðurnesjum fer með rannsókn málsins og eru um tuttugu sakamál nú þegar á borði lögreglunnar. Sakborningarnir í þeim málum voru erlendir ríkisborgarar í nánast öllum tilvikum. Þeir sitja nú í gæsluvarðhaldi. Þá hafa dómar þegar fallið í fimmtán málum og hafa menn verið dæmdir í allt að þriggja og hálfs árs fangelsi.

Einnig voru handlagðir 700 ml af fljótandi amfetamíni en það samsvarar um 6.998 grömmum af efninu í neyslustyrkleika. Þá var lagt hald á 196,5 grömm af metamfetamíni og 0,19 grömm af hassi. Efnin hafa verið gerð upptæk.

„Þetta er töluvert meira heldur en á síðasta ári,“ segir Jóhannes Jensson, aðstoðaryfirlögregluþjónn hjá lögreglunni á Suðurnesjum. Hann segist ekki vera með tölfræðina fyrir framan sig en þó sé mest áberandi hversu algengt kókaínið sé orðið til innflutnings enda sé það oftast handlagt.

Þá bendir hann á að þá skipti einnig máli að um breytilegan styrkleika sé að ræða en það geti þýtt að neysluskammtar hvers fíkniefnis geti verið mismunandi þar sem hægt sé að þinna efnið út.