Mála inngang Ráðhússins í regnbogalitunum

Stjórn Hinsegin daga og Dagur B. Eggertsson, borgarstjóri Reykjavíkur, munu mála fyrstu „gleðirendurnar“ við inngang Ráðhúss Reykjavíkur, sem snýr að Vonarstræti, á hádegi á morgun.

Heimreið Ráðhússins verður í framhaldinu máluð í öllum litum regnbogans af gestum og gangandi undir leiðsögn starfsfólks borgarinnar og hefur stjórn Hinsegin daga hvatt gesti á öllum aldri til að mæta og taka þátt í opnun hátíðarinnar.

Í tilkynningu frá stjórn Hinsegin daga segir að regnbogamálunin sé í dag orðinn fastur liður sem opnunaratriði hátíðarinnar. „Áður hafa Skólavörðustígur og tröppur Menntaskólans í Reykjavík verið klædd regnboga í tilefni Hinsegin daga.

Hinsegin dagar eru nú haldnir í nítjánda sinn og hefur hátíðin vaxið og dafnað með hverju ári. Í ár standa Hinsegin dagar frá 8. til 13. ágúst og á dagskránni eru um 30 viðburðir af ýmsum toga, þar má nefna ljósmyndasýningu, tónleika, dansleiki, dragsýningu og fleira auk fjölbreyttra fræðsluviðburða.

Hinsegin dagar ná hápunkti sínum laugardaginn 12. ágúst með gleðigöngu og útihátíð. Að þessu sinni fer gleðigangan frá Hverfisgötu að Hljómskálagarðinum þar sem útihátíð ársins fer fram. Undanfarin ár hafa um 70.000-100.000 gestir tekið þátt í dagskrá Hinsegin daga í tengslum við gleðigönguna og búast skipuleggjendur við miklum mannfjölda í ár enda veðurspáin góð.“