Pogba vonar að leikmenn City meiðist

Paul Pogba vonast eftir því að lykilmenn Manchester City meiðist og valdi því að liðið fari að misstíga sig í ensku úrvalsdeildinni. Þetta sagði hann í viðtali við BBC Sport.

„Ég vona að þeir muni misstíga sig,“ sagði Frakkinn, sem missir af grannaslag Manchester United og City um næstu helgi eftir að hann fékk beint rautt spjald í sigri United á Arsenal í gær.

„Ég vona, það er ljótt að segja þetta, en fyrir okkur þá vona ég að nokkrir mikilvægir leikmenn meiðist. Eins og gerst hefur hjá okkur. Það er ekki mikið talað um það en alltaf þegar við missum menn í meiðsli þá er það fyrir mikilvæga leiki.“

Manchester City er með átta stiga forystu á United á toppi ensku úrvalsdeildarinnar og virðast algjörlega óstöðvandi, en liðið hefur enn ekki tapað leik á tímabilinu.

„Ef það fer að gerast fyrir þá, kannski náum við að nýta okkur það,“ sagði Paul Pogba.