Söngparið Arnar Freyr Frostason og Salka Sól Eyfeld ætla að ganga í það heilaga. Salka Sól greinir frá því á Instagram síðu sinni að Arnar Freyr hafi beðið hennar. Svarið hafi að sjálfsögðu verið já.

Þau Arnar Freyr og Salka Sól, sem eru meðal vinsælasta tónlistarfólks landsins, hafa verið í sambandi í um tvö ár. Þeirra leiðir lágu fyrst saman á giggi og ræddi Arnar augnablikið í viðtali í Fréttablaðinu á dögunum.

„Á eftir sendi ég henni nokkur sæt skilaboð og hún beit á agnið. Ég held það hafi breytt mér að kynnast Sölku. Ég er svo lokaður og latur og hálfgerður einfari, get verið þungur og erfiður, en það eru læti í henni og hún drífur mig áfram. Salka er full af gleði og smitandi lífsorku og er ég henni óendanlega þakklátur fyrir.“

Salka virðist í skýjunum.

„Þessi spurði mig hvort ég vildi verða eiginkonan hans og ég sagði hell yeah bro!!“ sagði Salka í færslu sinni á Instagram. Hamingjuóskum rignir yfir parið á Instagram.