Köttur olli óhappi í Elliðaárdalnum

Köttur olli umferðaróhappi í Elliðaárdalnum á tíunda tímanum í gærkvöld. Lögreglan greinir frá því að hann hafi hlaupið í veg fyrir bíl með þeim afleiðingum að ökumaður hans missti alla stjórn og ók á brunn. Ökumaðurinn á að hafa fundið til eymsla í baki og víðar eftir áreksturinn og var fluttur á slysadeild til aðhlynningar. Flytja þurfti bílinn af vettvangi með dráttarbifreið.

Lögreglan þurfti að hafa afskipti af ungri konu í annarlegu ástandi við Hvassaleiti í Reykjavík á níunda tímanum í gærkvöldi.

Konan á að hafa gengið berserksgang í hverfinu og er hún grunuð um innbrot í bifreið og eignaspjöll. Þá er hún sögð hafa bitið konu en ekki er nánar greint frá því hvernig það kom til eða hvernig sambandi kvennanna er háttað.

 

Konan var vistuð í fangageymslu fyrir rannsókn málsins að sögn lögreglu.

Þá fékk lögregla tilkynningu um eld í bifreið við Laugarneskirkju á fjórða tímanum í nótt. Lögreglu tókst að ráða niðurlögum eldsins og var bifreiðin flutt af vettvangi eftir slökkvistarfið. Ekki er vitað um eldsupptök.

Þá var ölvamaður maður handtekinn í Mjóddinni skömmu áður fyrir kvöldfréttir. Hann er sagður hafa farið með innkaupakörfu fulla af matvöru úr versluninni án þess að greiða fyrir. Maðurinn mun einnig hafa gert það sama daginn áður. Honum var gert að sofa úr sér vímuna í fangageymslu þangað til hægt verður að yfirheyra hann.