Hernaðardrónar munu leita að földum fjársjóði

„Það eru allir rólegir, skipið er búið að liggja þarna frá 1667 og getur alveg legið aðeins lengur,“ segir Gísli Gíslason, frumkvöðull og athafnamaður, en hann fer fyrir hópi manna sem hefur áhuga á því að grafa upp fjársjóð hollenska skipsins Het Wapen van Amsterdam sem liggur einhvers staðar grafið í Skeiðarársand.

Mikið og oft hefur verið skrifað um fjársjóðinn og var gerð mikil leit að honum árið 1983 þar sem aðeins gamall togari fannst. Nú á að gera hlutina rétt og nota nýjustu tækni. „Það er margt búið að breytast frá síðustu leit. Nú er hægt að leita með dróna. Drónarnir senda þá bylgjur og við fáum 30 sinnum 30 metra kubba sem við rannsökum síðar,“ segir Gísli. Hann segir að trúlega séu um 100 skip undir sandinum en eftir að sandurinn hefur verið myndaður með drónanum er hægt að ákveða hvar sýni verði tekin. „Ef það er rétti staðurinn verður sest niður með ríkisvaldinu og ákveðin næstu skref.“

Gísli hefur verið í sambandi við fyrirtækið AeroVironment sem býður upp á fjölda dróna, meðal annars dróna sem verkefnið þarf. „Nema dróninn er skráður og skilgreindur sem hernaðartæki og það er því ekki hægt að kaupa einn slíkan. Þannig að ég ætla bara að fá fyrirtækið með mér í leitina svo ég geti fengið einn lánaðan. Leysa verkefnið þannig.“

Hópnum hefur borist viljayfirlýsing frá forsætisráðuneytinu sem hann hefur verið að bíða eftir. „Það eru mjög fá skip sem flokkast undir fjársjóðsskip sem er ekki búið að finna og grafa upp og svo framvegis. Það er sjaldgæft að það sé svona skip sem er nokkurn veginn vitað hvar er en er ekki búið að sækja. Sagan á bak við þetta skip er ótrúleg og í raun stórfurðulegt að enginn hafi hreyft legg eða lið í öll þessi ár,“ segir Gísli og ljóst að spenna er komin í kappann. Hann ætlar sér þó að flýta sér hægt. „Ég er kominn með nægan mannskap í þetta og það er til nægur peningur fyrir verkefnið en við ætlum að gera þetta rétt. Þetta er ævintýri en ekki leið til að verða ríkur og það verður gaman að sýna þjóðinni hvað er þarna um borð.“