Hringrás sögð menga of mikið fyrir Gunnunes

Ef starfsemi Björgunar hf. flyst á Gunnunes á Álfsnesi til viðbótar við umsvif Sorpu og aðra uppbyggingu verður náð þolmörkum fyrir viðkvæma náttúru svæðisins segir skrifstofa umhverfisgæða hjá Reykjavíkurborg sem telur óheppilegt að endurvinnslufyrirtækið Hringrás hf. fái lóð á Gunnunesi.

„Enn meiri uppbygging iðnaðar á svæðinu væri því alls ekki skynsamleg með tilliti til umhverfissjónarmiða. Þá er bæði átt við rask vegna uppbyggingar iðnaðarsvæða og nauðsynlegra innviða svo sem vegagerðar en einnig röskun og mengunarhættu vegna starfseminnar þar með talinnar skipaumferðar og umferðar ökutækja,“ segir í umsögn skrifstofu umhverfisgæða.

Lengi hefur legið fyrir að borgaryfirvöld og Faxaflóahafnir, eigandi núverandi lóðar undir Hringrás, vilja losna við fyrirtækið úr Laugarnesinu. Hringrás hefur augastað á Gunnunesi á Álfsnesi. Skipulagsfulltrúi leggst ekki gegn því fyrir sitt leyti en bendir á að skoða þurfi umhverfisþætti nánar. Skrifstofa umhverfisgæða hjá borginni segir ekki heppilegt að Hringrás flytji á Gunnunes jafnvel þótt Björgun myndi flytja þangað eins og er til skoðunar.

„Taka þarf ákvörðun með viðeigandi skipulagsbreytingum um hvort svæðið í heild sinni eigi að vera iðnaðarsvæði eða ekki og ef svo er, hversu mikið, frekar en að gerðar séu endurteknar litlar aðalskipulagsbreytingar á svæðinu í bútum,“ segir skrifstofa umhverfisgæða sem telur að að minnsta kosti eigi stærsti hluti Gunnuness að vera áfram opið svæði með óraskaðri náttúru.

Þá segir að ekki hafi staðið til að byggð af nokkru tagi rísi á Gunnunesi. Þess utan sé ekki svigrúm fyrir viðbótar 15 til 20 þúsund fermetra uppbyggingarsvæði innan þess svæðis sem mælt hafi verið með fyrir Björgun.

„Eins og komið hefur fram þá eru önnur svæði á Gunnunesinu ekki talin heppileg fyrir nokkra uppbyggingu, sérstaklega ekki uppbyggingu iðnaðarsvæða, vegna neikvæðra umhverfisáhrifa og minjaverndar,“ segir umhverfisgæðaskrifstofan.

Þá sé töluverður munur á starfsemi Hringrásar og Björgunar. Starfsemi Hringrásar snúist að miklu leyti um flutning og meðhöndlun á mengandi úrgangi og óæskilegum efnum en Björgun vinni fyrst og fremst með náttúruleg jarðefni. Hætta á mengunarslysum sé töluvert meiri hjá Hringrás. „Má benda á að það hafa orðið að minnsta kosti þrír brunar frá árinu 2004 á núverandi starfsstöð við Klettagarða,“ segir í umsögninni þar sem mælt er með því að Heilbrigðiseftirlit Reykjavíkur gefi álit á mengunarhættu af starfsemi beggja fyrirtækjanna.

Samkvæmt aðalskipulagi Reykjavíkur er Gunnunes sem og öll suður- og vesturströnd Álfsness skilgreind sem opið svæði. Umhverfisgæðaskrifstofan bendir á að í umsögn umhverfis- og skipulagssviðs frá í október 2016 komi fram að Gunnunesið almennt henti illa sem iðnaðarsvæði vegna náttúrufars og ásýndar sem séu þættir sem talið hafi verið mikilvægt að vernda. „Í því sambandi var meðal annars rætt um upprunalega strandlengju, mólendis- og votlendisgróðurlendi og varplönd fugla.“

Skipulagsfulltrúi hefur vísað málinu til umhverfis- og skipulagsráðs.