Gera upp Krá okkar allra: „Við erum klárlega að fara að halda í hjartað í húsinu“

Í vor tóku nýir eigendur við Vagninum, þekktri krá á Flateyri sem oft hefur verið nefnd krá allra landsmanna. Staðurinn á sína sögu og hefur lengi verið hluti af bæjarlífi íbúa. Margir af þekktustu tónlistarmönnum Íslands hafa spilað þarna og haldið uppi fjöri og sálarhlýju, þeirra á meðal Múgison.

Nú er svo komið að staðurinn þarfnast viðhalds. Þakið lekur og ýmislegt, sem áður var nýtt og fallegt, er nú orðið lúið.

Sett hefur verið á stað söfnun á Karolina fund til að fjármagna viðhaldið. Eigendur staðarins segja þetta hafa verið spurningu um hvort ætti að rífa húsnæðið eða endurreisa Vagninn. Þau segja að svarið hafi verið auðvelt. Vagninn skildi aftur rísa til fornrar frægðar.



Fengu gæsahúð af þakklæti

Sara Jónsdóttir, innanhúshönnuður og stjórnandi Hönnunarmars, er einn eigandi staðarins en alls eru þrjú pör sem standa að rekstrinum. Húsið er frá 1896 og þurfti mikið viðhald. Hún segir þetta vera samfélagsverkefni og allir hjálpist að.

„Þetta er mikilvægur staður fyrir þennan bæ og nærliggjandi bæi líka. Síðan kom að máli við mig Brynhildur Einarsdóttir en hún er Flateyringur sem býr í Reykjavík, og þá höfðu nokkrir Flateyringar talað sig saman um að þeim langaði að leggja þessu lið. Svo söfnunarhugmyndin kemur frá þeim sem er magnað. Við fengum gæsahúð af þakklæti. Þetta gerist sjaldnast í Reykjavík og það er eitthvað bara alveg sérstakt hérna á Flateyri, hvað fólk stendur þétt saman,“ segir Sara í samtali við Vísi.

Ekki gifsplötuhöll

Sara og maðurinn hennar, Hálfdán Lárus Pedersen, eru bæði innanhúshönnuðir og hafa meðal annars komið að hönnun Kex hostel og Brauð og Co. Þau ætla sér að halda í hjarta hússins. Sara nefnir að húsið hafi hins vegar verið afar illa farið vegna leka í þaki. Þá þurfi einnig að skoða glugga og burðarvirki hússins.

„Það er búið að breyta staðnum fram og til baka í gegnum tíðina. Þetta er hús sem hvar byggt í nokkrum hlutum og hefur verið ýmislegt svo upprunalegar innréttingar eru svo sem ekki margar. Við erum að fara að leita að upprunanum á bak við plötur og sjá hvað húsið hefur að geyma. Við erum ekki að fara að gera einhverjar gifsplötuhöll. Við erum klárlega að fara að halda í hjartað í húsinu og vinna út frá því,“ segir Sara í samtali við Vísi. 

Kvikmyndagerðarmenn, nuddari og innanhúshönnuður

Alls standa þrjú pör að rekstrinum. Auk Söru eru þau Geir Magnússon, ljósameistari í kvikmyndagerð, Ragnheiður Ólafsdóttir nuddari, Hálfdán Lárus leikmyndahönnuður auk þess að vera innanhúshönnuður, Sindri Páll Kjartansson kvikmyndagerðarmaður og pródúsent og Arnþrúður Dögg Sigurðardóttir,pródúsent  í eftirvinnslu kvikmyndageirans.Miklar framkvæmdir eru fram undan og því geta áhugasamir lagt verkefninu lið og aðstoðað við uppbyggingu á einni perlu bæjarins.