Talsverður erill hjá lögreglunni í Vestmannaeyjum

Fjórir gistu fangageymslur lögreglunnar í Vestmannaeyjum í nótt vegna ofbeldisbrota eða ölvunarástands. Tíu fíkniefnamál bættust við frá því í gær og eru þau nú komin vel á fjórða tug.

Einn þeirra sem gistir fangageymslur var tekinn með um tuttugu grömm af hvítu efni en hann er grunaður um að hafa ætlað að selja efnin.

Von er á frekari upplýsingum frá lögreglu upp úr hádegi í dag. Viðbragðsaðilar hittast á samráðsfundi í hádeginu á hverjum degi Þjóðhátíðar þar sem farið er yfir gang hátíðarinnar síðasta sólarhringinn.

Upplýst verður um kynferðisbrotamál ef ljóst þykir að rannsóknarhagsmunir séu tryggðir.