Átján slösuðust þegar brenna sprakk

Minnst átján slösuðust eftir að brenna sprakk á hátíð í Norður-Frakklandi í gær. BBC greinir frá.

Hátíðin var haldin í bænum Villepinte, skammt frá París. Kveikja átti á brennu á hátíðinni en ekki vildi betur til en svo að brennan hreinlega sprakk þegar kveikja átti upp í henni.

Kona og barn hennar liggja þungt haldin á spítala eftir sprenginguna en bæjarstjóri bæjarins var einn af þeim sem slösuðust.

Líkt og sjá má á myndbandinu hér fyrir neðan var um heilmikla sprengingu að ræða en lögregla telur að rekja megi sprenginguna til bensínsins sem notað var til þess að kveikja upp í brennunni.