Zlatan bjargaði stigi | Úrslit kvöldsins í enska boltanum

Zlatan Ibrahimovic sá til þess að Man. Utd fékk eitt stig í leiknum gegn Everton í kvöld. Hann jafnaði þá leikinn með marki úr vítaspyrnu á síðustu mínútu uppbótartímans.

Phil Jagielka kom Everton yfir í fyrri hálfleik. Löglegt mark var tekið af Zlatan í síðari hálfleik er hann var dæmdur rangstæður. Sá dómur var rangur.

Þetta var níunda jafntefli Man. Utd á heimavelli í vetur.

Leicester City vann sinn fimmta leik í röð er það kláraði Sunderland. Liðið getur ekki hætt að vinna undir stjórn Shakespeare.

Jóhann Berg Guðmundsson gat svo ekki leikið með Burnley vegna meiðsla er liðið lagði Stoke, 1-0.

Úrslit kvöldsins:

Burnley-Stoke 1-0

Leicester-Sunderland 2-0

Watford-WBA  2-0

Man. Utd-Everton  1-1

Fylgst var með gangi mála í kvöld og má sjá það hér að neðan.

Bein textalýsing:

20.53: Leik lokið á Old Trafford. Lokatölur 1-1.

20.52: Man. Utd - Leicester 1-1 !!!!!!! Zlatan jafnar úr víti í uppbótartíma. Hendi dæmd á Ashley Williams sem fékk svo að líta rauða spjaldið.

20.47: United með tvö fín færi en eru ótrúlegir klaufar fyrir framan markið.

20.43: Watford skellir WBA, 2-0. Aðeins einn leikur eftir. Enn 0-1 fyrir Everton á Old Trafford.

20.39: Burnley leggur Stoke. Ótrúlega seigir. 1-0 lokatölur.

20.36: Leicester vinnur 2-0 sigur á Sunderland. Fimm sigrar í röð með Shakespeare. Eins og í lygasögu. Sunderland ekki skorað í sex leikjum í röð eða í 540 mínútur. Ekkert fararsnið samt á Moyes.

20.20: Zlatan skorar með skalla en markið dæmt af vegna rangstöðu. Afar tæpt og sóknarmaðurinn var klárlega ekki að njóta vafans. Í endursýningu sést að þetta var kolrangur dómur. Mark tekið af United þarna.

20.19. Leicester - Sunderland 2-0 !!!! Jamie Vardy með sitt sjöunda mark í síðustu níu leikjum.  Hann er líka búinn að gefa tvær stoðsendingar í þessum níu leikjum. Leicester að loka þessum leik.

20.12. Leicester - Sunderland 1-0 !!!! Aumingja Moyes. Islam Slimani með markið fyrir Leicester.

20.00. Burnley-Stoke 1-0 !!!! Burnley er ótrúlegt lið á heimavelli og því kemur lítið á óvart að Jói Berg og félagar séu komnir yfir. George Burley með markið.

19.55. WATFORD - WBA 2-0 !!! Watford er ekkert að leika sér og hinn seigi Troy Deeney var að koma Watford í 2-0. Hann er þar með kominn í tíu mörk sjötta tímabilið í röð.

19.52: Hálfleikur á Old Trafford. Everton leiðir, 0-1. Mourinho hlýtur að íhuga breytingar strax í leikhléi.

19.36: Hálfleikur í fyrri leikjunum þremur. Watford 1-0 yfir gegn WBA en markalaust hjá Leicester og Sunderland sem og hjá Burnley og Stoke.

19.22: MAN. UTD - EVERTON 0-1 !!!!! Gestirnir komast yfir. Hár boltinn inn í teignum sem endar með því að Phil Jagielka setur tána í hann, með Marcos Rojo í bakinu, og boltinn lekur inn. Kæruleysislega gert hjá heimamönnum að verjast þessu ekki betur.

19.15: Marcus Rashford byrjar mjög vel í liði United í kvöld en ekki nógu vel því hann var að klúðra dauðafæri.

19.02: Okkar menn í Stoke frekar fyrirsjáanlegir í kvöld. 94,4 prósent sendinga upp völlinn fara til vinstri á Erik Pieters. Ekki einn bolti kominn upp hægra megin.

18.57: WATFORD-WBA 1-0 !!!! Auðvitað mátti ekki minnast á markaleysi og þá kom mark. M'Baye Niang búinn að skora fyrsta mark kvöldsins fyrir Watford gegn WBA.

18.56: Engin mörk komin en mikið af löngum sendingum í leik Burnley og Stoke.

18.45: Þrír leikir af fjórum farnir af stað. Leikur Man. Utd og Everton hefst klukkan 19.00.

18.36: Jose Mourinho segist hafa verið hundóánægður með Mkhitaryan í síðasta leik og því sé hann ekki leikfær. Pogba er aftur á móti ekki leikfær. Valencia er þreyttur og því er hann hvíldur. Rooney er slæmur í báðum ökklum og því ekki í hópnum.

18.32: Stjórnarformaður Leicester City á afmæli. Áhorfendur á King Power fá af því tilefni gefins kökusneið og bjór. Talað um það sé mögnuð tvenna.

18.29: Leicester kemur með sjálfstraustið í botni í leikinn gegn Sunderland þar sem liðið er búið að vinna fimm leiki í röð. Það er aftur á móti sjóðheitt undir David Moyes, stjóra Sunderland, og ekki síst eftir að hann sagðist vilja slá fréttakonu utan undir. Það sló ekki beint í gegn hjá honum en Sunderland stendur með honum. Enn sem komið er.

18.24: Það eru þrjár breytingar á liði Man. Utd frá síðasta leik er liðið gerði markalaust jafntefli gegn WBA. Ander Herrera og Zlatan koma til baka eftir bann en Daley Blind tekur stöðu Antonio Valencia í bakverðinum. Mkhitaryan og Martial er hent á bekkinn en Fellaini er að sjálfsögðu í liðinu. Pogba og Shaw eru líka á bekknum en Wayne Rooney er ekki í leikmannahópnum. Það eru tvær breytingar hjá Everton eftir tapið gegn Liverpool. Gareth Barry og Kevin Mirallas koma inn fyrir Matthew Pennington og Dominic Calvert-Lewin.

18.00 Fjórir leikir eru á dagskrá í kvöld en þar ber hæst viðureign Manchester United og Everton. Er United að fara að gera tólfta jafnteflið á tímabilinu?