Formaður Sýslumannafélags Íslands: „Þessi mál eru ofboðslega tilfinningarík“

„Þessi mál eru ofboðslega tilfinningarík,” segir Bjarni Stefánsson, formaður Sýslumannafélags Íslands, en hann var gestur í þættinum Reykjavík síðdegis á Bylgjunni í dag þar sem rætt var við hann um umgengistálmanir.

Fjallað var umgengistálmanir í kvöldfréttum Stöðvar tvö í síðustu viku en þar kom fram að dæmi séu um að það hafi tekið kerfið allt að fjögur ár að leiða til lykta mál þar sem annað foreldri hefur meinað hinu að umgangast barn sitt.

Bjarni segir ýmsar ástæður liggja að baki því að umgengnismál vilji oft verða ansi tímafrek.

„Þetta eru mál sem oft vilja verða ansi tímafrek. Það þarf að kalla aðila fyrir, stundum mæta þeir ekki og það getur verið erfiðleikum háð að hafa upp á þessu fólki til þess að ná af þeim skýrslum. Þannig geta málin dregist með þessum hætti.”

Þá segir Bjarni að að undanfari mála af þessu tagi geti verið mjög átakanlegur.

„Undanfarinn á þessum málum getur verið mjög átakanlegur. Á undan hafa kannski verið hjónskilnaðir, sambúðarslit og jafnvel andlegt eða líkamlegt ofbeldi á milli foreldra og barna. Svo koma stundum upp tilvik þar sem barn vill hreinlega ekki umgangast viðkomandi foreldri. Þetta geta því verið ákaflega erfið mál.”

Sýslumenn hafa engar valbeitingarheimildir

Bjarni segir það stundum vera hluta af vandamálinu að annað foreldrið láti ekki ná í sig og í sumum tilvikum þannig að það torveldi umgengni hins foreldrisins. Þegar svo beri að hafi sýslumenn engar valdbeitingarheimildir til þess að grípa inn í.

Hann telur þó lagaumhverfið ekki óljóst í þessum málum. Hins vegar sé að mörgu þurfi að gæta.

„Ég tel lagaumhverfi ekki vera neitt óljóst en þetta eru bara svo rosalega viðkvæm mál. Þarna er alltaf meginreglan að gera allt barninu fyrir bestu og passa sig að skemma ekki þeirra líf. Þá náttúrulega þarf að taka á þessum málum af mannlegheitum og varast það að skemma líf þessa fólks,” segir Bjarni.