Formaður fjárlaganefndar las fyrst um gjöf fjármálaráðherra í fjölmiðlum

„Um þennan gjörning veit ég ekkert,“ segir Haraldur Benediktsson, formaður fjárlaganefndar, um afhendingu fjármálaráðherra á íþróttamannvirkjum við Laugarvatn til sveitarfélagsins Bláskógabyggðar, sem sagt var frá í fréttum Stöðvar 2 í gær.

„Nei, ég skrollaði bara yfir fréttirnar í morgun og sá að hann var að undirrita einhvern gjörning við sveitarfélagið þarna,“ segir Haraldur.

Samkvæmt 40. gr. stjórnarskrárinnar verður eignum ríkisins ekki ráðstafað nema með lagaheimild. Aðspurður segist Haraldur ekki muna hvort heimild til ráðstöfunar þessara eigna hafi verið veitt í fjárlögum, en segir ekki óþekkt að slík heimild sé veitt eftir á og þá í fjáraukalögum.

„Það er langur vegur frá því að það sé hefðbundið að sækja svona heimild í fjáraukalögum, ég er ekki einu sinni viss um að það standist,“ segir Bjarkey Olsen Gunnarsdóttir, þingmaður og fulltrúi VG í fjárlaganefnd Alþingis.

Í 5. gr. fjárlaga fyrir 2017 er fjármála- og efnahagsráðherra veitt heimild til að „selja eignarhlut ríkisins í fasteignum framhalds- og sérskóla sem ekki eru lengur notaðar sem slíkar, og þykja ekki henta til skólahalds, og verja andvirðinu til endurbóta á skólahúsnæði í eigu ríkisins“.

„Þetta er með fyrirvara um samþykki Alþingis og verður væntanlega borið upp í fjáraukalögum í haust,“ segir Benedikt Jóhannesson fjármálaráðherra.

Ráðherra segir ekki óalgengt að samþykkis Alþingis sé aflað eftir á í svona tilvikum. „Reglan er að svona heimildir eru settar inn með fjárlögum og eru þá með í fjárlögum oft árum saman,“ segir Benedikt og bætir við: „Bara svona heimild sem einhverjum dettur í hug að setja inn, ef ske kynni.“

Ráðherra segir að þó málið hafi ekki verið rætt formlega við fjárlaganefnd hafi nokkrir nefndarmenn vitað af málinu, enda hafi það tvívegis verið kynnt í ríkisstjórn.

Um verðmat eignanna segir ráðherra erfitt að segja. Þá sé viðhaldsþörf orðin mikil á þessum húsum og samningurinn því í raun mjög hagstæður fyrir báða aðila.