Hæstiréttur Bandaríkjanna aftur fullskipaður

Hæstiréttur Bandaríkjanna er aftur orðinn fullskipaður eftir að Neil Gorsuch var svarinn í embætti klukkan 15 að íslenskum tíma í dag.

Gorsuch tekur sæti dómarans íhaldssama, Antonin Scalia, sem lést í febrúar á síðasta ári.

Öldungadeild Bandaríkjaþings samþykkti skipun Gorsuch í síðustu viku, en það var Donald Trump Bandaríkjaforseti sem tilnefndi dómarann.

Hinn 49 ára Gorsuch var fyrst svarinn í embætti við smærri athöfn fyrr í dag. Önnur athöfn fór svo fram á lóð Hvíta hússins í Washington þar sem Trump forseti var viðstaddur.

Barack Obama tilnefndi á sínum tíma Merrick Garland sem nýjan hæstaréttardómara, en öldungadeild Bandaríkjaþings, þar sem Repúblikanar eru í meirihluta, neitaði að greiða atkvæði um tilnefninguna. Sögðu þingmenn að næsti forseti skyldu tilnefna arftaka Scalia, eftir að Obama léti af embætti.