Líkir nýju ferðamannasalerni við Dyrhólaey við umhverfisslys

Mýrdælingar, eða nágrannar Dyrhólaeyjar, líkja útliti og staðsetningu á nýju ferðamannasalerni Umhverfisstofnunar fyrir ferðamenn á svæðinu við umhverfisslys. Þeir sem til þekkja telja að kostnaður sé líka orðinn langt umfram áætlun og nú stendur salernið ónotað þar sem enginn fæst til að sjá um rekstur þess.

Þórir Kjartansson, fyrrverandi sveitarstjórnarmaður Víkur í Mýrdal, segir að allir þeir heimamenn sem hann hafi rætt við telji staðsetningu salernanna algerlega fráleita. „Maður hélt alltaf að Umhverfisstofnun reyndi að hafa svona mannvirki sem best falin inn í landslagið en það er held ég ekki hægt að finna því minna áberandi stað. Það æpir á mann þegar maður kemur þarna og fer.“

Hefði verið hægt að staðsetja austan megin við bílastæðið

Þórir segir að hægt hefði verið að staðsetja salernin austan við nýja bílastæðið á svæðinu, inni í barði sem þar sé, þannig að einunis hefði sést í framhliðina.

„Svo er svo margt annað sem hægt er að tína til, eins og þessar kolryðguðu girðingar sem er búið að hengja þarna vítt og breitt um allt. Fólki finnt hálfgert verið búið að eyðileggja þessa náttúruperlu sem Dyrhólaey er. Þetta er að vísu það sem við köllum Lágey, austur af ey, en það fara nú fleiri þangað en upp að vitanum,“ segir Þórir.

Umhverfisslys

Þorir segir að um algert umhverfisslys sé að ræða. „Það er eins og að lánleysið yfir þessum framkvæmdum þarna sé svo mikið. Göngustígar eru settir á staði sem manni finnst oft gera illt vera, heldur en að gera þá ekki, stundum á staði þar sem hafi ekki verið að skemma. Svo er búið að krukka í það með einhverjum göngustíg sem vatn fer að renna eftir og þá er kominn lækjarfarvegur. Þetta er endalaust. Svo hafa eigendur Dyrhólaeyjar ekkert um þetta að segja. Allt vald virðist vera hjá Umhverfisstofnun í þessum málum,“ sagði Þórir Kjartansson í Vík.

Nú er í ráði að bæta umhirðu á salerninu við störf landvarða á Suðurlandi, en fréttastofa hefur fengið staðfest úr þeirra röðum að slíkt sé ekki raunhæft miðað við mikinn gestafjölda sem orðinn er við Dyrhólaey.