Fjóla beðin afsökunar eftir að hafa þurft að þola ósmekkleg ummæli

„Ég er búin að fá mikil viðbrögð við þessu,“ segir söngkonan Fjóla Kristín Nikulásdóttir um skrif sem hún birtir á Facebook þar sem hún greinir frá ósmekklegum athugasemdum sem hún hefur orðið fyrir af hendi karla í tónlistarbransanum eftir að hafa skipt um starf. Eftir að hún greindi frá þessu hefur einn þeirra haft samband og beðið hana afsökunar.

Fjóla stjórnar Hljómfélaginu, blönduðum kór, og tók nýverið tímabundið við kór Flensborgarskólans. Á því vikutímabili sem hún skipti um vinnu var hún til dæmis spurð af einum karlkyns kollega hennar: „Ertu að hætta hjá okkur? Á hvað á ég þá að horfa?“

Annar sagði ekkert mál fyrir hana að safna strákum í kórinn því hún sé svo sæt.

„Karlakórar virðast hljóma best þegar fagrar ljóskur stjórna,“ var einnig sagt við hana og þá sagði annar í hennar viðurvist:

„Þú átt ekkert að vera að djöflast þetta í karlakórum, farðu frekar í kórinn til þessarar fallegu konu. Þá hefur þú allavega eitthvað að horfa á á æfingum.“

Reyna að skrifa velgengni á útlit hennar

Fjóla tekur fram í skrifum sínum að svo virðist vera að þegar henni gengur vel séu fyrstu viðbrögð karla í kringum hana að útskýra það með útliti hennar og hárlit. „Ég ætla að leyfa mér að vera svo djörf að trúa því að öll sú vinna og metnaður sem ég legg í verkefni mín sé það sem skilar velgengni, alveg eins og það gerir hjá þeim.“

Hún segir þessar athugasemdir alls ekki bundnar við vinnustað en þær hafi komið frá tónlistarmönnum. Eftir að Fjóla birti þetta á Facebook kannaðist einn við ummæli frá sér og hafði samband við Fjólu til að biðjast afsökunar.

„Hann sá að sér og viðurkenndi að þetta væri ósmekklegt og að það væri sorglegt að þetta viðgangist. Hann ætlaði framvegis að passa sig og vanda sig,“ segir Fjóla.

Ekki sagt í einhverri illgirni

Hún tekur fram að ekkert af þess var sagt í einhverri illgirni. „Þetta er eitthvað sem viðgengst að segja og kasta fram í vinalegu spjalli. Maður tekur varla eftir þessu því þetta er svo algengt.“

Fjóla segist vera langt því eina manneskjan sem lendir í þessu. Um daginn átti hún samtal við þrjár vinkonur sínar, sem allar eru söngkonur, á kaffihúsi og kom þá í ljós að þær höfðu allar lent í þessu.

„Þetta er kúltúr sem hefur fengið að lifa of lengi og er vonandi að deyja út. Við erum á einhverju ferðalagi en erum ekki komin á leiðarenda.“

Stakk niður penna eftir að hafa hlustað á Harmageddon

Hún segir þessi ummæli hafa setið í sér lengi en eftir að hafa hlustað á Frosta Logason ræða um stöðu kvenna innan tónlistarbransann gat hún ekki orða bundist.

„Orðræðan er stundum einkennileg og það er bara ömurlegt að heyra fullorðið fólk segja í útvarpi að kona geti ekki náð góðum árangri nema með aðstoð karla, tjah eða að þær séu of miklir ræflar til að geta spilað á trommur,“ segir Fjóla í pistli sínum á Facebook sem má lesa hér fyrir neðan: