City gæti náð í Sanchez í janúar eftir meiðsli Jesus og de Bruyne

Meiðsli Kevin de Bruyne og Gabriel Jesus gætu orðið til þess að Manchester City geri kauptilboð í Alexis Sanchez fyrr en áætlað var.

Félagið ætlaði sér að bíða þar til í sumar og fá þá Sílemanninn frítt, en samningur hans við Arsenal rennur út í sumar.

Hins vegar staðfesti Pep Guardiola að það verði fundað innan húss til þess að ákveða hvort félagið eigi að reyna að fá sóknarmanninn strax í janúar.

Nú þegar hefur komið í ljós að Jesus verði frá í allt að tvo mánuði, en staða de Bruyne mun ekki koma í ljós fyrr en á morgun. Báðir meiddust þeir í viðureign City og Crystal Palace í dag.

Guardiola vildi þó ekki gefa of mikið upp, hann sagði Sanchez enn vera leikmann Arsenal og að hann yrði það líklegast áfram, en það yrði þó fundað um málið.