Mótmælendur kveiktu í þinghúsi vegna umdeildrar stjórnarskrárbreytingar

Mótmælendur í Paragvæ kveiktu í þinghúsi landsins í gærkvöldi í kjölfar þess að öldungardeild þingsins samþykkti tillögu að umdeildri stjórnarskrárbreytingu. Breytingin hefur það í för með sér að sitjandi forseti, Horacio Cartes, og aðrir forverar hans geta gefið kost á sér að nýju í næstu forsetakosningum.

Greinir BBC frá því að hundruð mótmælanda hafi verið saman komnir fyrir utan þinghúsið til að mótmæla stjórnarskrárbreytingunni og fór allt gjörsamlega úr böndunum. Komust nokkrir mótmælendanna inn í þinghúsið þar sem þeir lögðu skrifstofur þeirra þingmanna sem samþykktu tillöguna í rúst og kveiktu í blöðum og húsgögnum.

Beitti lögregla meðal annars vatnsbyssu og skaut gúmmíkúlum að mótmælendum til að aftra för þeirra að þinghúsinu. Töluverður fjöldi fólks slasaðist en á meðal þeirra voru mótmælendur, lögreglumenn og stjórnmálamenn. Þá börðust slökkviliðsmenn við eldinn sem varaði í eina til tvær klukkustundir. 

Samkvæmt núverandi stjórnarskrá frá árinu 1992 er sú regla í gildi að forseti landsins getur einungis setið eitt kjörtímabil sem varir í fimm ár. Nái tillagan fram að ganga gæti því Cartes boðið sig fram til endurkjörs þegar kjörtímabili hans lýkur á næsta ári. Áður en núverandi stjórnarskráin tók gildi hafði Paragvæ verið undir einræðisstjórn í um 35 ára skeið.

Alls 25 af 45 öldungardeildarþingmönnum samþykktu tillöguna sem vakið hefur mikla reiði almennings í landinu. Mun tillagan næst vera lögð fyrir fulltrúardeild þingsins en þar hefur flokkur Cartes meirihluta svo líklegt þykir að hún verði samþykkt þar. Fari svo verður tillagan borin undir þjóðaratkvæði.