Varað við aukinni skjálftavirkni á Hellisheiði vegna framkvæmda

Almannavarnadeild Ríkislögreglustjóra, fulltrúa Orkustofnunar og fulltrúum sveitarfélaganna Ölfuss og Hveragerðis hefur verið sent erindi vegna aukinnar hættu á jarðskjálftavirkni samfara fyrirhugaðri niðurdælingu í borholur á virkjanasvæðinu á Hellisheiði.

Í matsskýrslu Íslenskra orkurannsókna er reiknað með að skjálftavirkni verði einhverju minni en í fyrri lotum, en þó megi reikna með að stöku skjálftar geti farið yfir 3 Mi að stærð og muni finnast í byggð. Óþægindi ættu þó ekki að vera teljandi og eignatjón mjög ólíklegt, segir í skýrslunni.

„Þetta er gert í fullu samráði við alla hlutaðeigandi,“ segir Aldís Hafsteinsdóttir, bæjarstjóri í Hveragerði, sem fylgist vel með skjálftavirkninni.

Um er að ræða niðurdælingu í svokallaða HE 55 holu í Hverahlíð sem boruð var sem vinnsluhola en nýta á sem niðurdælingarholu. Samkvæmt niðurstöðu fyrrnefndrar matsskýrslu fylgir henni óveruleg hætta á finnanlegum jarðskjálftum í byggð.

Niðurdæling á Gráhnjúkasvæðinu veldur einnig óverulegri hættu á aukinni skjálftavirkni, en á Húsmúlasvæðinu er hins vegar talin hætta á að aukin losun vegna hækkaðs þrýstings kunni að leiða af sér aukna og finnanlega jarðskjálftavirkni. Hækkun á þrýstingi þar fer í gang á næstu dögum, segir Eiríkur Hjálmarsson, talsmaður Orku náttúrunnar.

Hengilssvæðið er eldvirkt og skjálftavirkni þekkt óháð framkvæmdum. Hins vegar varð aukinnar skjálftavirkni strax vart þegar niðurdæling við Húsmúla hófst í september 2011.

Heildarfjöldi skjálfta á áhrifasvæði niðurdælingarinnar er tæplega 10.000 skjálftar frá upphafi mælinga árið 1995, en rúmlega 8.000 skjálftar hafa mælst frá því niðurdæling hófst við Húsmúla 2011. Þrátt fyrir að um virkt svæði sé að ræða er náttúruleg spennusöfnun ekki eins ör og hún var áður en niðurdæling hófst á svæðinu. Samkvæmt niðurstöðu matsskýrslunnar er ástæðan sú að niðurdæling sem veldur jarðskjálftavirkni leysir spennuna að einhverju leyti út jafnóðum.