Ólafur: Það er búið að ganga mikið á og því er ég ótrúlega stoltur

„Ég er mjög stoltur af stelpunum og þetta er búið að vera frábært tímabil hjá okkur,“ segir Ólafur Þór Guðbjörnsson, þjálfari Stjörnunnar, eftir að liðið hafði tryggt sér Íslandsmeistaratitilinn í Pepsi-deild kvenna árið 2016. Liðið vann FH 4-0 á Samsung-vellinum í Garðabæ í kvöld.

„Það er búið að ganga mikið á hjá liðinu í sumar og því er þetta skemmtilegur endir hér á Samsung-vellinum með öllu þessu fólki. Við höfum verið með stöðugusta liðið í sumar og verið á toppnum í deildinni í öllum umferðum nema tveimur og ég held að við eigum þetta alveg inni.“

Ólafur segir að liðið sé mjög samhelt og með frábæra karaktera innanborðs.

„Það er frábær mórall í liðinu og við höfum staðið saman í gegnum allt í sumar. Það er karakterinn í liðinu sem skilar því svona langt.“