Chelsea og PSG búin að ná samkomulagi um kaupin á David Luiz

Chelsea greindi fyrir skemmstu frá því að félagið hefði náð samkomulagi við Paris Saint-Germain um kaup á brasilíska varnarmanninum David Luiz.

Hann á nú aðeins eftir að standast læknisskoðun og semja um kaup og kjör við Chelsea.

Luiz þekkir vel til hjá Chelsea en hann lék með Lundúnaliðinu á árunum 2011-14. Luiz vann þrjá stóra titla sem leikmaður Chelsea, þ.á.m. Meistaradeild Evrópu vorið 2012.

Chelsea seldi Luiz til PSG sumarið 2014 fyrir 50 milljónir punda en kaupir hann núna til baka á 30 milljónir punda.

Luiz er annar leikmaðurinn sem Chelsea kaupir í dag en fyrr í dag var spænski varnarmaðurinn Marcos Alonso kynntur til leiks hjá félaginu.

Kólumbíumaðurinn Juan Cuadrado var hins vegar lánaður aftur til Juventus. Nýi lánssamningurinn er til þriggja ára.