Lögregluskóli hættir en biðlaun skólastjórans eru fyrst hækkuð

Kjararáð hækkaði laun Karls Gauta Hjaltasonar, skólastjóra Lögregluskóla ríkisins, í 1,2 milljónir króna á mánuði með ákvörðun á fundi í síðustu viku. Leggja á niður starf skólastjórans ásamt Lögregluskóla ríkisins frá og með 30. september.

Karl Gauti á rétt á ársbiðlaunum bjóðist honum ekki annað sambærilegt starf hjá ríkinu eða einkaaðilum. Laun Karls Gauta hækka afturvirkt til 1. janúar 2015 og fylgir þróun launa kjararáðs.

Alþingi samþykkti lagafrumvarp Ólafar Nordal innanríkisráðherra í maí, sem kveður á um að menntun lögreglumanna verði færð á háskólastig og Lögregluskóli ríkisins ásamt starfi skólastjórans verði lagður niður í haust. Ríkiskaup auglýsa nú eftir háskólum sem hafi áhuga á að taka námið að sér.

Karl Gauti á rétt á eins árs biðlaunum þar sem hann hefur starfað lengur en 15 ár hjá ríkinu.

Ákvörðun kjararáðs kemur í kjölfar bréfs sem Karl Gauti sendi ráðinu 9.desember 2015, áður en frumvarp um að leggja Lögregluskólann niður kom fram. Í því óskaði Karl Gauti eftir því að laun hans tækju mið af launum lögreglustjóra og sýslumanna.

Í úrskurði kjararáðs segir að ekki hafi verið úrskurðað um laun skólastjórans frá 2004. Sá úrskurður er ekki aðgengilegur á vefsíðu kjararáðs.

Nýjustu fáanlegu upplýsingar um laun skólastjóra Lögregluskólans eru í svari fjármálaráðherra við fyrirspurn Eyglóar Harðardóttur á Alþingi veturinn 2011 til 2012. Þar kemur fram að hann skuli fá greitt eftir launaflokki 502-133. Föst laun í þeim launaflokki eftir almenna 7,15 prósenta hækkun kjararáðs frá 1. júní eru 866 þúsund krónur á mánuði. Ekki kemur fram í svarinu hve há föst yfirvinna sé greidd með starfinu.

Eftir hækkunina nú verða föst laun skólastjórans 957 þúsund krónur á mánuði auk greiðslna fyrir 25 fasta yfirvinnutíma sem nema 239 þúsund krónum á mánuði.

Ekki hefur náðst í Jónas Þór Guðmundsson, formann kjararáðs, eða starfsmenn kjararáðs þrátt fyrir ítrekaðar tilraunir.





Hverjir skipa kjararáð?



Kjararáð er skipað til fjögurra ára í senn. Í því sitja fimm nefndarmenn, þrír eru kosnir af Alþingi, einn er skipaður af Hæstarétti og einn af fjármála- og efnahagsráðherra. Núverandi nefndarmenn í kjararáði eru skipaðir til 30. júní 2018.

Jónas Þór Guðmundsson, formaður Kjararáðs hæstaréttalögmaður, formaður kjararáðs,

Óskar Bergsson, varformaður kjararáðs, kosinn af Alþingi

Svanhildur Kaaber, kosin af Alþingi

Vilhjálmur H. Vilhjálmsson, skipaður af Hæstarétti

Hulda Árnadóttir, skipuð af fjármála- og efnahagsráðherra

Fréttin birtist fyrst í Fréttablaðinu