Ranieri fær nýtt samningstilboð

Englandsmeistarar Leicester City hafa augljóslega engan áhuga á því að missa stjórann sinn, Claudio Ranieri.

Eigendur félagsins ætla nú að bjóða honum nýjan og lengri samning. Núverandi samningur Ranieri við félagið rennur út árið 2018.

„Þegar við ræðum við Ranieri þá munum við bara ræða um langan samning,“ sagði varastjórnarformaður Leicester, Aiyawatt Srivaddhanaprabha.

Ranieri er orðinn 64 ára gamall og eftir kraftaverkið með Leicester er hann eðlilega orðinn eftirsóttur. Formaður ítalska knattspyrnusambandsins sagði í upphafi vikunnar að Ranieri ætti að koma, taka við landsliðinu og vinna HM með Ítölum.