Gylfi hefur sett sér það markmið að bæta met Eiðs Smára

Gylfi Þór Sigurðsson skoraði sitt ellefta mark í ensku úrvalsdeildinni um helgina þegar hann tryggði Swansea City 1-0 sigur á Chelsea en hann er ekki hættur.

Gylfi gulltryggði að Swansea City spilar í ensku úrvalsdeildinni á næstu leiktíð en liðið er komið með 40 stig eftir sigurinn á Chelsea.

Gylfi ætlar þó ekkert að slaka á því hann hefur sett stefnuna á það að ná markameti Eiðs Smára Guðjohnsen frá 2001-02.

„Ég er kominn með 25 mörk fyrir Swansea og þar með jafn Wilfried Bony. Vonandi næ ég marki til viðbótar og bæti metið áður en leiktíðin er búin. Það fylgir því frábær tilfinning að ná þessum áfanga og það er mjög gott fyrir miðjumann að vera á þessum stað," sagði Gylfi Þór Sigurðsson í viðtali við Sindra Sverrisson í Morgunblaðinu.

„Ég ætla líka að reyna að bæta met Eiðs [Smára Guðjohnsen] sem skoraði 14 mörk á einu tímabili en ég hef fáa leiki til stefnu. Ég þarf þrjú mörk í viðbót áður en leiktíðin er búin, og það er markmiðið mitt," sagði Gylfi.

Eiður Smári setti markamet Íslendings í ensku úrvalsdeildinni þegar hann skoraði 14 mörk í 32 leikjum fyrir Chelsea tímabilið 2001 til 2002. Gylfi hefur skorað 11 mörk í 33 leikjum á þessu tímabili.