Gylfi: Þetta lítur vel út fyrir okkur

„Þetta lítur vel út fyrir okkur. Frábær sigur hjá okkur í dag og góður leikur af okkar hálfu,“ segir Gylfi Þór Sigurðsson, leikmaður Swansea, eftir sigurinn gegn Chelsea í dag.

Gylfi skoraði eina mark leiksins og hefur hann einfaldlega farið á kostum á tímabilinu, sérstaklega á þessu ári.

„Við byrjuðum leikinn virkilega vel og komum inn í hann að krafti. Við náðum að pressa þá oft inn á þeirra eigin vallarhelming og reyndum að þvinga þá í að gera mistök. Heilt yfir áttum við skilið að vinna þennan leik.“

Gylfi segir að liðið hafi vissulega getað spilað örlítið betur undir lok leiksins.

„Við féllum of mikið til baka undir lokin og vorum kannski aðeins of mikið að hugsa um að halda í þessi þrjú stig sem við vorum komnir með.“

Gylfi hefur nú skorað 25 mörk fyrir Swansea í úrvalsdeildinni og er það jöfnun á meti hjá félaginu.

„Auðvitað er alltaf mikilvægast að ná í þrjú stig en ég er mjög stoltur af þessu afreki og vonandi slæ ég metið á þessu tímabili.“

Hér að neðan má sjá myndband af viðtalinu við Gylfa.