Auðvelt hjá Arsenal | Sjáðu mörkin

Arsenal er komið í átta liða úrslitin í enska bikarnum eftir sigur á Hull City, 0-4, í kvöld.

Það var fátt í kortunum í fyrri hálfleik að það kæmi mark er David Meyler, varnarmaður Hull, ákvað að renna boltanum á Olivier Giroud, framherja Arsenal, sem þakka fyrir sig með því að skora.

Giroud varð faðir í gær og fagnaði með barnafagninu hans Bebeto. Þetta var greinilega kvöld Giroud því hann skoraði aftur í síðari hálfleik.

Theo Walcott afgreiddi svo leikinn endanlega á 77. mínútu er hann gleymdist í teignum og renndi boltanum í fjærhornið. Hann var ekki hættur því skömmu fyrir leikslok skoraði hann aftur en Jakupovic hefði þó átt að verja í markinu.

Sigurinn var dýr fyrir Arsenal því Per Mertesacker, Gabriel Paulista og Aaron Ramsey meiddust allir í leiknum.

Arsenal mun spila á heimavelli gegn Watford í næstu umferð. Leikurinn fer fram um næstu helgi.

Giroud kemur Arsenal yfir. Síðustu þrjú mörk leiksins.