Diouf: Ég er heimsklassa leikmaður en Carragher er drasl

El-Hadji Diouf, fyrrverandi leikmaður Liverpool og senegalska landsliðsins, setur orðastríð sitt og gömlu liðsfélaga sinna, Steven Gerrard og Jamie Carragher, aftur af stað í viðtali við fótboltatímaritið So Foot. Það er vefur Eurosport sem greinir frá.

Þessi skrautlegi leikmaður hefur áður sagt að Steven Gerrard, hinn dýrkaði og dáði fyrirliði Liverpool til margra ára, sé afar óvinsæll utan Liverpool og þá ásakaði hann Gerrard einnig um rasisma.

Hvorki Jamie Carragher né Steven Gerrard tala neitt sérstaklega vel um Diouf í ævisögum sínum sem komu út á síðustu mánuðum. Það sem þeir höfðu að segja um hann í þeim fór ekkert sérstaklega vel í Senegalann.

„Munurinn á mér og Jamie Carragher er, að ég er heimsklassa leikmaður og hann er drasl. Hann er svona skíthæll sem skrifar bók og minnist á mig endalaust. Hann fær ekki eina setningu um sig í minni bók því hann er algjör aumingi,“ segir Diouf í viðtalinu þar sem hann notar mikið af blótsyrðum.

Gerrard segir í ævisögu sinni að Diouf sé ekki í miklu uppáhaldi hjá sér og hann hafi ekki verið góð kaup fyrir Liverpool. Diouf svarar fyrir það í nýja viðtalinu og gerir það með látum.

„Ég bar landsliðið á bakinu í mörg ár og var með fjórtán milljónir stuðningsmanna á herðum mínum. Þegar við unnum var það mér að þakka og þegar við töpuðum var það mér að kenna. Steven Gerrard náði ekki að vera einn hundraðasti af því fyrir England. Hann hefur aldrei gert neitt á HM eða EM,“ segir Diouf.

„Gerrard hélt að ég bæri ekki virðingu fyrir Liverpool því ég gerði bara það sem ég vildi þegar ég kom þangað. En hann er maðurinn sem gerði út um vonir síns liðs þegar hann rann á móti Chelsea. Það er engin tilviljun að Liverpool hefur aldrei unnið ensku úrvalsdeildina. Menn uppskera eins og þeir sá,“ segir El-Hadji Diouf