Segir ásakanir um rasisma hjá Gerrard ærumeiðandi

Lögfræðingur Stevens Gerrards, leikmanns LA Galaxy í MLS-deildinni og fyrrverandi fyrirliða Liverpool, vísar ásökunum Senegalans El Hadji Diouf í garð Gerrards til föðurhúsanna.

Diouf tók sig til og urðaði yfir Gerrard á útvarpsstöð í Senegal þar sem hann sagði:

„Það vita allir að Gerrard er illa við svart fólkt. Þegar ég var hjá Liverpool sýndi ég honum að ég væri ekki enskur heldur svartur og yfir mig væri ekki valtað. Allan tímann sem ég var hjá Liverpool þorði hann ekki að horfa í augun á mér.“

„Gerrard afrekaði aldrei það sem hann vildi í fótboltanum. Þegar ég kom til Liverpool var ég aðal maðurinn en hann var bara einhver sem bjó þarna. Ég er virtur í fótboltaheiminum. Sérfræðingar völdu mig á meðal sjö bestu leikmanna HM og einn af 100 bestu leikmönnum aldarinnar.“

Eins og gefur að skilja voru menn í horni Gerrards ekkert sérstaklega kátir og tjáir einn lögfræðingur hans sig um málið í Daily Mail. „Þessar ásakanir eru algjörlega rangar og virkilega ærumeiðandi,“ segir hann.

Gerrard og Diouf hefur aldrei komið vel saman, en í nýrri ævisögu sinni segir Gerrard að Diouf hafi aldrei haft neinn sérstakan áhuga á fótbolta en ummæli Gerrards í bókinni urðu til þess að Diouf lét vaða í umræddu útvarpsviðtali.