Janúar 2016 var einn af fjórum bestu mánuðum Gylfa Þórs

Þó Janúar sé ekki formlega búinn er honum lokið í ensku úrvalsdeildinni þar sem næsta helgi er bikarhelgi. Liðin 20 spiluðu fjóra leiki í mánuðinum sem er að líða undir lok.

Janúar 2016 var einn af fjórum bestu mánuðum Gylfa Þórs Sigurðssonar, íslenska landsliðsmannsins hjá Swansea, í ensku úrvalsdeildinni frá því hann spilaði þar fyrst seinni hluta tímabilsins 2011/2012.

Sjá einnig:Gylfi skorar mun meira utan Wales

Gylfi skoraði þrjú mörk í fjórum leikjum Swansea, þar af eitt um síðustu helgi á móti Everton. Þar klíndi íslenski landsliðsmaðurinn boltann í samskeytin úr vítaspyrnu, óverjandi fyrir Tim Howard í markinu.

Gylfi skoraði ekki bara þrjú mörk í fjórum leikjum heldur skoraði hann í þremur leikjum Swansea af fjórum. Hann skoraði í tveimur tapleikjum; gegn Manchester United og Sunderland, en í einum sigurleik gegn Everton um liðna helgi.

Fín tilraun, Tim.

Byrjaði síðustu leiktíð vel

Þetta er í annað sinn sem Gylfi skorar þrjú mörk í fjórum leikjum í einum og sama mánuðinum í ensku úrvalsdeildinni. Það afrekaði hann líka í september 2013 sem leikmaður Tottenham.

Gylfi skoraði þá bæði mörkin í sigri á Norwich og eitt mark í jafntefli gegn Chelsea á White Hart Lane. Honum mistókst þann mánuðinn að skora á móti Cardiff og þá var hann ónotaður varamaður í Lundúnaslag gegn Arsenal sem tapaðist, 1-0.

Miðjumaðurinn sparkvissi var í miklum ham í byrjun tímabils í fyrra var ágústmánuður 2014 honum góður. Gylfi byrjaði síðasta tímabil með látum og skoraði eitt mark og lagði upp önnur fjögur þann mánuðinn.

Leikmaður mánaðarins

Gylfi Þór skoraði og lagði upp í fyrsta leik síðasta tímabils á móti Manchester United, gaf svo stoðsendinguna í sigurmarkinu á móti Burnley og lagði upp tvö mörk í 3-0 sigri á West Bromwich Albion.

Besti mánuður Gylfa í ensku úrvalsdeildinni var samt í mars 2012 þegar hann var á láni frá Hoffenheim. Hann skoraði þá fjögur mörk í fjórum leikjum; tvö á móti Wigan og tvö á móti Fulham, og var kjörinn leikmaður mánaðarins fyrir frammistöðu sína. Hann er eini Íslendingurinn sem hlotið hefur þá viðurkenningu.

Gylfi er búinn að skora fimm mörk í ensku úrvalsdeildinni á þessari leiktíð og komu þrjú þeirra í janúar. Hann er á mikilli uppleið á ný með Swansea eftir daufan fyrri hluta tímabils.

Á mikilli uppleið

Enski blaðamaðurinn Ben McAleer greinir uppgang Gylfa Þórs í tölfræðigrein sem hann tók saman fyrir tölfræðivefinn Whoscored.com. Þar kemur fram að einkunn Gylfa fyrir frammistöðu sína með Swansea hefur hækkað síðan Garry Monk var látinn fara.

Undir stjórn Monk var Gylfi Þór með 6,47 í meðaleinkunn samkvæmt einkunnagjöf Whoscored, en eftir að Alan Curtis tók við er Gylfi Þór að fá 7,10 í einkunn. Whoscored er ein allra öflugasta tölfræðisíða fótboltans og birtir Sky Sports margar greinar byggðar á tölfræði síðunnar.

Article for @WhoScored looking at Gylfi Sigurdsson's return to form for Swansea https://t.co/KqidLSsnpM#Swanspic.twitter.com/p9fjNdKJZ8

— Ben McAleer (@BenMcAleer1) January 25, 2016

Í fyrstu þrettán leikjum tímabilsins skoraði Gylfi tvö mörk og gaf eina stoðsendingu, en í síðustu sjö hefur hann skorað þrjú mörk. Þá er hann að ná fleiri skotum á markið; 2,6 á móti 1,9 áður.

Gylfi er að gefa fleiri sendingar í leik þó sendingahlutfall hans er á sma niðurleið, en lykilsendingarnar eru næstum tvöfalt fleiri undir stjórn Curtis og Ítalans Francesco Guidolin.

Bestu mánuðir Gylfa í ensku úrvalsdeildinni:

Mars 2012: Fjögur mörk í fjórum leikjum fyrir Swansea og kjörinn leikmaður mánaðarins

September 2013: Þrjú mörk í fjórum leikjum fyrir Tottenham

Ágúst 2014: Eitt mark og fjórar stoðsendingar fyrir Swansea

Janúar 2016: Þrjú mörk í fjórum leikjum fyrir Swansea.