Ramsey-bölvunin heldur áfram að senda fræga fólkið í gröfina

Frægt fólk út um allan heim er orðið logandi hrætt við mörk velska miðjumannsins Aarons Ramsey fyrir Arsenal.

Hann hefur síðan 2011 verið með „bölvun“ sér sem virkar þannig að stundum þegar hann skorar andast einhver frægur daginn eftir.

Þetta hófst fyrir fimm árum þegar Ramsey skoraði daginn áður en Osama Bin Laden var ráðinn af dögum af bandaríska hernum.

Hann sneri sér svo að Hollywood-leikurum, söngstjörnum og viðskiptamönnum, en stjörnur á borð við Whitney Houston, Paul Walker, Steve Jobs og Robin Williams létust allar daginn eftir að Walesverjinn skoraði.

Ramsey er búinn að skora í tveimur leikjum í röð fyrir Arsenal og eftir það létust tveir afskaplega hæfileikaríkir menn.

Eftir mark Ramsey gegn Sunderland síðastliðinn laugardag kvaddi David Bowie, en hann hafði glímt lengi við krabbamein. Ramsey skoraði svo fyrir Arsenal á Anfield í gær og eftir það lést breski leikarinn Alan Rickman.

„Þetta er það ruglaðasta sem ég hef heyrt. Það hefur komið fyrir að ég skori og einhver deyr en þetta er bara rugl. Ég er samt búinn að ráða nokkra vonda karla af dögunum,“ sagði Ramsey um bölvunina í ágúst á síðasta ári.

@aaronramsey you killed Bowie! How could you?!

— Aryeh Lehrer (@lez566) January 12, 2016