Bíó og sjónvarp

María er leynivopn Steypustöðvarinnar

Sara McMahon skrifar
Steindi Jr, Auðunn Blöndal og Ágúst Bent hlakka til við að hefjast handa við að taka upp gamanþættina Steypustöðina, sem hefja göngu sína á Stöð 2 í janúar.
Steindi Jr, Auðunn Blöndal og Ágúst Bent hlakka til við að hefjast handa við að taka upp gamanþættina Steypustöðina, sem hefja göngu sína á Stöð 2 í janúar. Mynd/GVA
Þetta verður með svipuðu sniði og Steindinn okkar og Svínasúpan enda sömu handritshöfundar sem vinna að þáttunum, þannig fólk ætti svolítið að geta getið sér til um hvernig serían verður,“ segir Steinþór Hróar Steinþórsson, betur þekktur sem Steindi Jr, um nýja gamanþætti sem hefja göngu sína á Stöð 2 í byrjun næsta árs.

Þættirnir nefnast Steypustöðin og með aðalhlutverk fara auk Steinda sjálfs, Sverrir Þór Sverrisson, Saga Garðarsdóttir, Ágústa Eva Erlendsdóttir, Auðunn Blöndal og María Guðmundsdóttir.



María Guðmundsdóttir, sem hóf leikferil sinn um sextugt, hefur komið að flestum gamanþáttum Steinda og er kölluð "Queen María“ á tökustað.Valli
Ráðist verður í tökur eftir helgi og leita Steindi og félagar því logandi ljósi að heimilum til leigu þar sem taka mætti upp senur.

„Þetta er yfirleitt dagur sem við þurfum í tökur á hverjum stað. Við þurfum nokkur heimili og best væri ef þau væru það rúmgóð að þau nýttust í fleiri en einn skets. Þannig ef einhver treystir okkur og þorir að lána okkur heimilið sitt í einn dag á næstu sex vikum, þá erum við að leita,“ segir framleiðandi þáttanna, Atli Viðar Þorsteinsson.

 

Aðspurður segir Steindi að búast megi við því að þáttaröðin verði geggjuð og hlakkar hann mikið til að hefjast handa við að skjóta efnið.

„Mér líst hrikalega vel þetta, skrifferlið er búið að vera æðislegt og þetta lítur allaveganna vel út á blaði. Við höfum líka flest unnið saman áður þannig þetta er þéttur hópur. María er svo leynivopnið okkar, hún er æðisleg og ég vil helst ekki gera neitt án hennar,“ segir hann.

Hópurinn verður með opinn Snap Chat reikning (snap-365) og getur fólk því fylgst með tökum í beinni. 

 

Þeir sem hafa áhuga á að leigja íbúð undir tökur geta sent póst á netfangið steypustodintv@gmail.com.



Greinin birtist fyrst í Fréttablaðinu þann 16. september.






Fleiri fréttir

Sjá meira


×