Skoða nýja veglínu á Holtavörðuheiði

Kristján Möller, þingmaður Samfylkingarinnar og fyrrverandi samgönguráðherra, fór mikinn í Reykjavík síðdegis á Bylgjunni síðastliðinn mánudag þar sem hann hélt því fram að hægt væri að lækka veginn um Holtavörðuheiði um 60 til 70 metra.

Þetta sagði Kristján í umræðu um færð á vegum en fjöldi ferðalanga hefur lent í vandræðum á Holtavörðuheiði vegna ófærðar í vetur og hafa ófáir þurft að dvelja tímunum saman í Staðarskála í Hrútafirði á meðan þeir bíða fregna um mokstur á heiðinni.

Kristján sagði slíkar framkvæmdir á Holtavörðuheiði ekki samgönguáætlun en starfsmenn Vegagerðarinnar hefðu hins vegar framkvæmt mælingar á stöðum sem kæmu til greina fyrir nýtt vegstæði sem yrði um 60 -70 metrum fyrir neðan núverandi veg á Holtavörðuheiði sem er í 410 metra hæð yfir sjávarmáli þar sem hann er hæstur.

Lítið vitað um snjósöfnun

Því myndi það muna töluverðu þegar kemur að veðurhæð en Magnús V. Jóhannsson, svæðisstjóri Vegagerðarinnar í Borgarnesi, segir að ekki hafi verið könnuð snjósöfnun á þessu svæði.

„Við höfum lagt fram hugmyndir að veglínum þarna neðar við Holtavörðuvatnið, þetta er einhverjum 80 metrum lægra þar sem vegurinn er hæstur núna. Einhverjar snjókannanir hafa verið gerðar en kannski lítið. Við höfum hins vegar haft veðurstöð þarna síðastliðin þrjú ár sem við höfum fært á milli staða. Við höfum ekki mikið unnið úr þeim gögnum en eigum þau. Þetta er ekki á dagskrá en þetta bara svona forkönnun hjá Vegagerðinni, við vitum að margir hafa áhuga á þessu,“ segir Magnús.

Segir marga sannfærða um betra veðurfar neðar

Hann segir Vegagerðina ekki hafa nákvæmar upplýsingar um veðurfar neðan við veginn um Holtavörðuheiði, þar sem hann er hæstur, en Magnús segir þó marga sannfærða um að það sé betra þar. 

„Við sjáum það líka á þessum veðurgögnum að þetta nær ekki sama vindstyrk. Þarna niðri eru kannski meiri líkur á meiri snjósöfnun og að það safnist meira á veginum. Á sínum tíma fyrir 30 til 40 árum þegar ákveðið var að fara þarna upp þá var það mat manna að vegurinn hreinsaði sig betur þarna uppi en þá var ekki opnað nema tvisvar í viku. Í dag er allt annað viðhorf með tilliti til þjónustu á vegakerfinu á hverjum einasta degi,“ segir Magnús. 

Hann segir þetta einungis á könnunarstigi og mörg önnur verkefni sem talin eru brýnni þegar kemur að vegaframkvæmdum. „Þessi veðurfarsgögn eru mjög spennandi og mælirinn er uppi núna og á þriðja staðnum sem við erum að prófa. Við eigum gögnin en erum bara að vinna að öðru.“