Foreldrar ræði við unglinga um Saurlífi

Aðstandendur unglinga í Laugardals- og Háaleitishverfum fengu nýlega bréf skólum í hverfunum þar sem þeir eru hvattir til að ræða við unglinga sína um það efni sem birtist á Snapchat-aðganginum Saurlífi.

„Ég held að foreldrarnir séu mjög þakklátir að fá að heyra af þessu. Við sem vinnum á félagsmiðstöðinni erum kannski nær krökkunum í þessum málum. Við heyrum kannski oftar af svona hlutum en foreldrar jafnvel,“ segir Þórunn Vignisdóttir, forstöðukona Laugó, félagsmiðstöðvar Laugalækjarskóla, í samtali við Vísi um bréfið.

Senda inn hvers kyns saurlífi og ólifnað

Á Saurlífi eru fylgjendur aðgangsins hvattir til að senda inn hvers kyns saurlífi og ólifnað og geta þeir sem fylgja Saurlífi á Snapchat skoðað þessar myndir eða myndskeið í allt að sólarhring eftir að þau birtast.

„Það eru mjög svæsnir hlutir inn á þessu. Þetta er klámfengið efni og það er verið að auglýsa eiturlyfjaneyslu, þannig að það verður náttúrlega að ræða við krakkana um þessa hluti þegar þau sjá þá, og það sjá þetta allir unglingar. Allir unglingar fara inn á þetta og núna vitum við með upplýsingum frá krökkunum að þegar þessum aðgangi verður lokað þá verður örugglega einhvern annar opnaður í staðinn, sem er alltaf þannig. Svona hlutir hverfa aldrei, það kemur bara einhver annar aðgangur í staðinn,“ segir Þórunn og hvetur aðstandendur unglinga til að ræða þessa hluti við þá.

„Það verður að tala um að þetta sé ekki eðlilegt, að það sé ekki eðlilegt að sitja og skoða þessa hluti. Þetta er ekki brandari, þetta er klámfengið efni og það er verið að auglýsa eiturlyfjaneyslu og ekkert af því er eitthvað sem á að vera á eðlilegum mánudegi hjá unglingi,“ segir Þórunn.

„Frekar subbulegt“

Hún segir starfsmenn félagsmiðstöðva eiga samtöl við unglingana um þessi mál við misjafnar undirtektir. „Þeim finnst þetta öllum frekar subbulegt, ég held að þau séu flest sammála um að þetta sé ekki í lagi. En þau sjá þetta eflaust á einhvern hátt sem brandara en ég held að þau geri sér öll grein fyrir að þetta sé ekki eðlilegt,“ segir Þórunn og minnir foreldra á að vera meðvitaða um hvað krakkarnir eru að gera í símanum sínum.

„Síminn er tæki sem þau eru með á hverjum einasta degi og þau nota hann mikið. Hann er líka frábært tæki og hann er notaður líka á frábæran hátt. Þau taka myndir til að deila með vinum sínum og eru í samskiptum við aðra og hann er líka æðislegt tæki. En þess vegna þarf að kenna krökkunum ábyrgðina að vera með slíkt tæki. Þegar maður sér aðgang eins og þennan að þá sé rætt við krakkana hvers vegna þetta sé ekki í lagi og hvers vegna þetta sé ekki eðlilegt.“