Um 80 manns fögnuðu með Geir á Akureyri: „Ólýsanleg tilfinning“

Það var heldur betur glatt á hjalla á heimili Kristínar S. Bjarnadóttur og fjölskyldu hennar í Sigluvík í Eyjafirði, til móts við Akureyri, í síðustu viku. Þar var haldinn fögnuður í tilefni af heimkomu Geirs Gunnarssonar sem var nýverið látinn laus úr Greensville-fangelsinu í Virginíu-fylki Bandaríkjanna þar sem hann sat inni í rúm sautján ár.

Árið 1998 hlaut Geir tuttugu ára fangelsisdóm í Bandaríkjunum fyrir alvarlega líkamsárás. Geir hefur nú verið frjáls maður í um það bil mánuð og kom nýverið heim til Íslands þar sem hann hefur aftur komist í kynni við fjölskyldu og vini, og jafnvel þá vini sem hann hafði eignast á meðan hann  var í fangelsi en aldrei hitt.

Heimkoman undirbúin í nokkur ár

Kristín S. Bjarnadóttir fór fyrir hópi sem undirbjó heimkomu Geirs en hún og aðrir sem stóðu að þessum undirbúningi höfðu fylgst með Geir í tæp níu ár og má segja að sá undirbúningur hafi staðið yfir frá því Sigmar Guðmundsson tók viðtal við Geir í fangelsinu í Bandaríkjunum árið 2007 fyrir Kastljósið.

Sjá einnig: Geir á heimleið eftir 17 ár í fangelsi: Vill hjálpa öðrum sem leiðst hafa út á ranga braut

Sigmar tók aftur viðtal við Geir á dögunum í tilefni af heimkomunni og var því útvarpað í Morgunútvarpi Rásar 2. Þar sagði Geir viðtalið hafa breytt miklu fyrir því eftir það hefði honum ekki fundist hann vera einn í lífinu. Hann fann fyrir miklum stuðningi frá Íslandi og vissi að hann ætti möguleika þar eftir að hann losnaði úr afplánun.

Lýsir Kristínu sem engli sem var sendur til hans

Í viðtalinu í morgun sagði Geir frá heimkomufögnuðinum sem haldinn var fyrir hann á heimili Kristínar í síðust viku. „Fullt af fólki, fullt af mat og mikið fjör,“ sagði Geir sem lýsti Kristínu sem engli. „Hún er í alvöru talað engill sem var sendur til að redda þessu fyrir mig. Það var mjög gott að hafa hana í mínu horni og gott að hafa hana til að hjálpa mér að komast af stað,“ sagði Geir um Kristínu.

Hún hafði átt í bréfasamskiptum við Geir í áraraðir og hafði tvisvar heimsótt Geir í fangelsið ásamt dóttur sinni Sóleyju Maríu Kristínardóttur. Mæðgurnar höfðu stofnað hópinn Vinir Geirs á Facebook sem safnaði í sjóð fyrir Geir svo hann hefði eitthvað þegar hann kæmi hingað til lands, enda alls laus eftir fangelsisvistina.



„Alveg magnað“

Kristín segir í samtali við Vísi að þau sem standa að sjóðnum hefðu ákveðið fyrir löngu að hafa opið hús heima hjá henni þegar Geir kæmi til landsins. Fögnuðurinn var í síðustu viku og mættu um áttatíu manns heim til Kristínar til að fagna með Geir.

„Þetta var náttúrlega bara ólýsanleg tilfinning fyrir alla sem að þessu hafa staðið. Við höfum fylgst með honum í tæp níu ár og búið að bíða lengi eftir þessum degi ,“ segir Kristín. Hún segir að Geir hefði liðið eins og hann væri að koma heim þegar hann kom til Akureyrar en hún hafði sent honum bækur í fangelsið með myndum frá Íslandi, þá sérstaklega Reykjavík og Akureyri.

„Honum fannst hann svolítið vera að koma heim þegar hann kom. Hann var búinn að skoða svo mikið af myndum og svona. Honum fannst hann aðallega vera kominn heim þegar hann kom til Keflavíkur en svo er þetta svona annað að koma heim því hann er búinn að vera í svo miklu sambandi við fólk hérna fyrir norðan sem hefur verið að skrifa honum og fá myndir og svona. Þannig að þetta var alveg magnað.“