Dr. Guðmundur Hálfdanarson skipaður forseti Hugvísindasviðs Háskóla Íslands

Dr. Guðmundur Hálfdanarson, Jón Sigurðssonar prófessor í sagnfræði við Háskóla Íslands, hefur verið ráðinn forseti Hugvísindasviðs Háskóla Íslands.

Guðmundur lauk doktorsprófi í evrópskri félagssögu frá Cornell-háskóla í Bandaríkjunum árið 1991 en áður hafði hann lokið meistaraprófi í sagnfræði frá sama skóla (1985). Guðmundur stundaði þar áður nám í Svíþjóð og á Íslandi og lauk m.a. bakkalárprófi í sagnfræði og fornleifafræði frá Háskóla Íslands árið 1980 og kandídatsprófi í sagnfræði frá sama skóla tveimur árum síðar. 

Guðmundur hefur gegnt mikilvægum stjórnunarstörfum innan Háskóla Íslands og hefur setið í fjölda stjórna og ráða, bæði innan Háskóla Íslands og í þágu íslensks og alþjóðlegs vísindasamfélags.

Guðmundur tekur við starfinu af Ástráði Eysteinssyni, prófessor í almennri bókmenntafræði, hinn 1. janúar 2016.