Helgidómur fyrir ása og náttúruna

Sólargangurinn verður nýttur til að lýsa inn í bygginguna og gullinsnið er meginstefið í hönnun hennar. Hofið verður staðsett undir Öskjuhlíðinni rétt við göngustíginn, austan við veitingastaðinn Nauthól og Háskólann í Reykjavík, við Menntaveg. Byggingin verður að mestu úr íslensku timbri, 360 fermetrar að stærð og tvö hundruð fermetra aðalsalur mun geta rúmað 250 manns. Félagið á hins vegar rétt á byggingarmagni upp á 850 fermetra sem notað verður síðar. 

Náttúran í forgrunni 

„Við notum tvíbreið form, náttúran byggir allt á svona tvíbyggðum formum. Hvelfingin er byggð úr íslensku timbri og byggingin verður fyrir áhrifum af umhverfinu, brekkunni sem hún verður byggð í", sagði Magnús Jensson, arkitekt og ásatrúarmaður. Helgidómurinn sjálfur, aðalhúsið þar sem viðburðir fara fram er timburstrúktúr, segir Magnús. „Helgidómurinn er á einni hæð og að hluta byggður inn í bergið. Það hefur verið ein af uppáhaldshugmyndum okkar að fá svona tímalausa náttúrustemmningu. Með bergveggi á bak við okkur og ná ljósi inn á þá. Þannig að það sé ekkert sem minni mann á nútímann og heldur ekki á víkingatímann eins og mörgum hættir til", sagði Magnús brosandi.  

Hofið rís á næsta ári

Hæst verður húsið um átta metrar. Helgidómurinn rís fyrst og er að hluta niðurgrafin en svo verður tengibygging fyrir félagsheimili sem rís síðar. Framkvæmdir hefjast í mars næstkomandi og náttúruefni á lóðinni verða notuð. Félagar eru orðnir 2500 í ásatrúarfélaginu. Hofið verður fullbúið haustið 2016 og kostnaðurinn um 130 milljónir sem félagið hefur safnað, en Reykjavíkurborg gefur lóðina, um 2500 fermetra.   

Hamingjuóskir frá Indverskum ásatrúarmönnum

Byggingaráformin vekja mikla athygli í erlendis, hingað til lands hafa komið blaðamenn frá sænska ríkisútvarpinu og The Guardian, BBC fjallaði líka um hofið Reuters fréttaveitan sömuleiðis. Síminn hefur ekki stoppað í nokkra daga segir Magnús. „Þetta er eins og flóðbylgja og svo verður hún sennilega bara búin", sagði Magnús en athyglin sem ánægjuleg og samstaða ásatrúarmanna um allan heim einkar skemmtileg. „Það er alveg rosalega gaman hvað heiðni heimurinn stendur saman. Ég hef rekist á síður þar sem Indverjar eru að tala um bræður sína, hina heiðingjana og óska öllum innilega til hamingju með árangurinn og hvað þetta sé allt saman fínt hjá okkur. Maður verður hálf klökkur".