Fundu fyrir ógleði og verkjum vegna gólflakks

Uppfært: 13:25

Allt tiltækt slökkvilið var kallað út vegna gruns um eiturefnalega í Síðumúlanum um hádegisbilið í dag. Slökkviliðinu barst fjöldi tilkynninga um að fólk fyndi fyrir ógleði, verkjum og fleira.

Þær tilkynningar litu ekki vel út og því var allt tiltækt lið kallað út og eiturefnadeild slökkviliðsins virkjuð, ef um eiturefni hefði verið að ræða.

Í ljós hefur komið að í gærkvöldi hafði gólf í kjallara Síðumúla 29 verið lakkað með Epoxy-lakki. Það leiddi til áðurnefndra óþæginda.

Þegar í ljós kom að  ekki var um eiturefnaleka að ræða var dregið úr útkallinu og flestir kallaðir heim aftur. Slökkviliðsmenn eru enn á staðnum og verið er að loftræsta. Enginn var fluttur með sjúkrabíl.